खोज

दाङ, ४ मंसिर ।

दाङमा आईतबार भएको प्रतिनिधिसभा र प्रदेशसभा सदस्य निर्वाचनमा करिव ६० प्रतिशत मत खसेको प्रारम्भिक अनुमान गरिएको छ । जिल्लामा सबै मतदान केन्द्रमा शान्तिपूर्ण वातावरणमा मतदान कार्य सम्पन्न भएको प्रदेश निर्वाचन कार्यालय दाङका प्रमुख नारायणप्रसाद भण्डारीले जानकारी दिए । जिल्लाभरका ४ सय ६५ वटै मतदान केन्द्रमा ६० प्रतिशतको हाराहारीमा मतदान भएको अनुमान गरिएको छ ।

दाङमा निर्वाचन क्षेत्र नम्बर १ मा कुल ५१ वटा मतदान स्थलमा १ सय ५२ वटा मतदान केन्द्र रहेकोमा १२ जना संघीय उम्मेदवार प्रतिष्पर्धामा छन् । जसका लागि १ लाख ३४ हजार ७ सय २८ मतदाता रहेका थिए ।

यस्तै, क्षेत्र नम्बर २ मा ४८ वटा मतदान स्थलमा १ सय ४६ वटा मतदान केन्द्र निर्धारण गरिएकोमा १५ जना संघीय उम्मेदवार प्रतिष्पर्धामा छन् । जसका लागि १ लाख ३३ हजार ७ सय ४८ मतदाता थिए ।

क्षेत्र नम्बर ३ मा ५४ वटा मतदान स्थलमा १ सय ६७ मतदान केन्द्र निर्धारण गरिएको थियो । जहाँ १५ जना संघीय उम्मेदवार प्रतिष्पर्धामा रहेका छन् । जसका लागि १ लाख ४६ हजार ४ सय ७५ जना मतदाता थिए ।

दाङमा ४ लाख १४ हजार ९ सय ५६ मतदाता रहेकोमा ३ लाख ५० हजार मतदाताले मतदान गरेको हुन सक्ने अनुमान गरिएको छ । यसको यकिन विवरण आउन अझै केही समय लाग्ने बताईएको छ ।

दाङको १ सय ५३ वटै मतदान स्थलमा रहेका ४ सय ६५ मतदान केन्द्रमा शान्तिपूर्ण वातावरणमा मतदान भएको मुख्य निर्वाचन अधिकृत कृपासुर कार्कीले जानकारी दिए ।

आइतबार मतदान कार्य सम्पन्न भएपछि मतपेटिका मतगणना स्थलमा ल्याउने काम भइरहेको छ । तीन वटै क्षेत्रको तीन स्थानबाट मतगणना गरिने भएको छ । जस अनुसार क्षेत्र नम्बर १ को लमही नगरपालिकामा, क्षेत्र नम्बर २ को जिल्ला समन्वय समिति भवनमा र क्षेत्र नम्बर ३ को तुलसीपुरमा भू–संरक्षण कार्यालयमा मतगणना गर्ने गरी सबै तयारी गरिएको छ । सो स्थानमा मतपेटिका मतदान केन्द्रबाट ल्याउने काम भईरहेको मुख्य निर्वाचन अधिकृत कार्कीले बताए । मतपेटिका संकलन गर्न समय लाग्ने भएकाले मतगणना कार्य सोमबार बिहानबाट गरिने उनले बताए ।