खोज

बुटवल, १५ चैत्र ।
लायन्स क्लब अफ बुटवल सयपत्रीले बुटवल–८, सुख्खानगरस्थित मानव आश्रममा आश्रित ५० जना अभिभावकविहीन दिदीबहिनीहरूलाई खानपान तथा खाद्यान्न सामग्री हस्तान्तरण गरेको छ । मानव आश्रमले विभिन्न कारणले अभिभावक गुमाएका तथा असहाय अवस्थामा रहेका महिलाहरूलाई आश्रय दिँदै आएको छ । आश्रमले उनीहरूलाई सुरक्षित बासस्थान, खानपान, स्वास्थ्य सेवा र सीपमूलक तालिमको व्यवस्था गर्दै आएको छ ।

क्लबकी अध्यक्ष कमला बस्नेत कुँवरको अध्यक्षतामा सम्पन्न कार्यक्रममा लायन्स ३२५ पीका डिष्ट्रिक गभर्नर पुरुषोत्तम भक्त प्रधानाङ्ग प्रमुख अतिथि रहेका थिए । उनले मानव आश्रमजस्ता संस्थाहरूलाई निरन्तर सहयोग आवश्यक रहेको बताउँदै, “सामाजिक सेवाका यस्ता कार्यहरूले पीडितहरू प्रति अपनत्व र आत्मीयता बढाउँछ,” भने ।सयपत्रीका अध्यक्ष कमला बस्नेतले अभिभावक गुमाएका दिदीबहिनीहरूको जीवनस्तर सुधार्न, आत्मविश्वास बढाउन तथा उनीहरूलाई खुसी दिलाउने उद्देश्यले सहयोग गरिएको बताउँदै, यो शुरुवात मात्र भएको र आगामी दिनमा अझ बढी सहयोग गर्ने प्रतिबद्धता जनाइन् ।

कार्यक्रममा निवर्तमान डिष्ट्रिक गभर्नर अर्जुनमान सैजु, डिष्ट्रिक ट्रेजरर प्रकाश श्रेष्ठ, एरिया चिफ दीपक श्रेष्ठ, रिजन चेयरपर्सन विष्णु उपाध्याय, एओजी कल्पना शिवाकोटी लगायतको उपस्थिति रहेको थियो । कार्यक्रमको संयोजन माया राईले गरेकी थिइन् भने सञ्चालन सचिव शान्ति लक्ष्मी अर्यालले गरेकी थिइन् ।