खोज

सुर्खेत,८ चैत ।
कर्णाली प्रदेशमा सवारी साधनका स्वचालित नम्बर प्लेट पहिचान गर्ने डिजिटल प्रविधिको जडान गरिएको छ प्रदेशको मुख्य प्रवेशद्वार बबईमा उक्त प्रविधि जडान गरिएको छ । मुख्य राजमार्गमा पहिलो पटक जडान गरिएको उक्त प्रविधिले सम्पूर्ण सवारी साधनको नम्बर प्लेट रेकर्ड राख्ने गर्दछ । प्रविधिले प्रदेश भित्रिने र बाहिरिने सबै सवारी साधनहरूको अटोमेटिक डिजिटल रेकर्ड राख्न र जुनसुकै स्थानहरूबाट त्यहाँको गतिविधि निगरानी गर्न मद्दत गर्दछ । आन्तरिक मामिला तथा कानुन मन्त्रालयले ९ लाख ७६ हजार लागतमा उक्त प्रविधि जडान गरेको हो ।

कर्णालीका मुख्यमन्त्री यामलाल कँडेलले शुक्रबार एक कार्यक्रमका बिच डिजिटल प्रविधिको उद्घाटन गर्दैे अब प्रहरीले एकान्तकुनामा सवारी चेकजाँग गर्ने काम नगर्न आग्रह गरे । अब प्रहरीले सवारी साधन रोक्दै, नम्बर प्लेट फाइलमा नाम टिप्नुपर्ने अवस्थाको अन्त्य भएको कँडेलले बताए। ‘यसको प्रभावकारिता आवश्यक छ,’ कँडेलले भने, ‘नाका र चेक प्वाइन्टमा चेक गरे भैगो नि, किन एकान्तकुना जानुपथ्र्याे ।’ डिजिटल प्रविधिको पहिलो पटक सुरुवात गरिएको बताउँदै कँडेलले यसको सही सदुपयोग गरी सकारात्मक प्रभाव पार्नुपर्ने औल्याए ।

अब बबईमा भएको गतिविधि वीरेन्द्रनगरमा रहेको प्रदेश प्रहरी कार्यालयबाट निगरानी गर्न सकिने प्रहरी वरिष्ठ उपरीक्षक शिवकुमार श्रेष्ठले बताए ।यसले शान्ति सुरक्षालाई थप मजबुत बनाउन सहयोग पुग्ने उनको भनाई थियो ।