खोज

बुटवल, १ मंसिर ।

हाम्रो नेपाली पार्टीको लौरो अभियानले सत्ता गठबन्धनले आफ्नो दलविरुद्ध भ्रमपूर्ण समाचार फैलाएको आरोप लगाएको छ ।

बुधबार गृहमन्त्री खाणसहित गठबन्धनका उम्मेदवारहरुले बुटवलमा पत्रकार सम्मेलन गर्दै हाम्रो नेपाली पार्टीका निकोलश भनिने कमल भुसाल नेतृत्वको लौरो अभियानले गठबन्धनलाई समर्थन गरेको बताएका थिए । कार्यक्रममा निम्त्याइएका सो पार्टीका तुल्सीराम भुसाललाई महामन्त्रीको रुपमा आसनग्रहण गराइएको थियो । उनले आफ्नो मन्तव्य राख्दै रुपन्देही २ र ३ गठबन्धनलाई समर्थन गर्ने बताएका थिए ।

तर त्यसको १२ घण्टा नबित्दै हाम्रो नेपाली पार्टीले सत्ता गठबन्धनले भ्रमपूर्ण प्रचार गरेको भन्दै आपत्ति जनाएको छ । रुपन्देही क्षेत्र २ र ३ नम्बरका उम्मेदवारहरु सहभागी बुधबारको कार्यक्रममा गृहमन्त्री खाणसहित अन्य उम्मेदवारहरु समेत सहभागी थिए । त्यसक्रममा गृहमन्त्री खाणले विपक्षी दल र उम्मेदवारले भ्रमपूर्ण सूचनाहरु प्रवाह गरिरहेको आरोप लगाएका थिए ।

तर उनकै कार्यक्रममा भ्रमपूर्ण प्रचार गरिएको लौरो अभियानको आरोप छ । ‘लौरो अभियान’ का नामले परिचित हाम्रो नेपाली पार्टीले आफूहहरुको अभियानलाई बदनाम गराउने नियतले भ्रामक हल्ला चलाइएको भन्दै आपत्ति जनाएको हो । हाम्रो नेपाली पार्टीका प्रवक्ता ई. डिल्लिश्वोर कार्की ‘रोहन’ ले विज्ञप्ति निकाल्दै कुनै दल वा गठबन्धनका उम्मेदवारलाई समर्थन, तालमेल गरेको भनेर आइरहेका समाचारहरु निराधार रहेको बताएका छन् ।

रुपन्देही २ मा सत्ता गठबन्धनका उम्मेदवार जनमुक्तिका केशवबहादुर थापा मगरलाई लौरो अभियानको समर्थन रहेको भनी मिडियाबाजी गरेपछि आफुहरु प्रष्टीकरण दिन बाध्य भएको प्रवक्ता कार्कीले बताए ।

थापा एमालेका विष्णु पौडेलका मुख्य प्रतिस्पर्धी हुन् । ‘सत्ताको आडमा गठबन्धनले कुप्रचार गरेको छ । यसबाट हाम्रो अभियानमाथि अविश्वास गराउन खोजिएको छ’, उनले भने । ‘हाम्रो लौरो अभियानले स्वतन्त्र उम्मेदवारबाहेक कसैलाइ पनि समर्थन गर्ने कुरा हाम्रो सिद्धान्तमै नरहेको हुनाले देशैभरि जहाँजहाँ हाम्रा लौरो उम्मेदवारहरु हुनुहुन्न, त्यहाँ हामीले स्वतन्त्रहरुलाई समर्थन गरिसकेको र गर्न बाँकी ठाउँमा समेत सक्षम स्वतन्त्र उम्मेदवारलाई समर्थन गर्नेबारे छलफल भइरहेको कुरा अवगत गराउछौं’, हाम्रो नेपाली पार्टीको विज्ञप्तिमा भनिएको छ । महामन्त्री तुलसिराम भुसालको नाममा गठबन्धनका उम्मेदवारलाई समर्थन गरिएको भनेर प्रचार गरिएको भन्दै भुसाल हाम्रो नेपाली पार्टीको तथा लौरो अभियानको साधारण सदस्यसमेत नरहेको साथै चिन्दै नचिनेको प्रवक्ता कार्कीले बताए ।