खोज

चन्द्रौटा(कपिलवस्तु), ३० कात्तिक ।

कपिलवस्तु क्षेत्र नम्बर ३ का नेकपा एमाले प्रतिनिधि सभा सदस्य पदका उम्मेदवार मंगल प्रसाद गुप्ताले सत्ता र कुर्सीको लोभले ५ दलीय गठबन्धन गरिएको आरोप लगाएका छन् । मिलिजुली, पालैपालो मन्त्री र प्रधानमन्त्री बन्ने कुर्सीको लोभमा गठबन्धन गरिएकोले जनता सचेत हुनुपर्ने उनको भनाइ छ ।

उनले ती पार्टीका एक आपसमा वैचारिक सिद्धान्त र राजनैतिक सिद्धान्त नमिल्ने हुँदा गठबन्धन टिक्न नसक्ने दाबीसमेत गरे । बुधबार शिवराज नगरपालिका–५ चन्द्रौटामा आयोजित नेकपा एमालेको बृहत घरदैलो तथा आम सभा कार्यक्रममा उम्मेदवार गुप्ताले यस्तो बताएका हुन् ।

उनले भने; ’नेता–नेता बीच सम्झौता हुन सक्छ । तर जनता–जनताबीच कदापि सम्झौता हुन सक्दैन’ । परमादेशी सरकारको कार्यकालमा देशमा चरम महङ्गी, अत्यधिक व्याजदर बृद्धि र इन्जन जस्ता अत्यावश्यक वस्तुमा चरम मुल्य बृद्धिले नागरिक आजित भइसकेको बताए ।

उनले देश डुब्न लागेको भन्दै अब जनताले जनमतबाट जोगाउन आवश्यक रहेको जिकिर गरे । उनले देशमा स्थिर सरकार नभएसम्म सुशासन, विकास र समृद्धि हुन नसक्ने बताउँदै एमाले नेतृत्वको सरकार आवश्यक रहेको हुँदा एमाले जिताउन आम जनतालाई अनुरोेध समेत गरे ।

यसैगरी क्षेत्र नम्बर ३ (१) का प्रदेश सभा सदस्य तथा निवर्तमान सांसद अर्जुन कुमार केसीले आफ्नो क्षेत्रमा भौतिक पुर्वाधार, शिक्षा, स्वास्थ्य र कृषिमा उल्लेखनीय विकास गरेको बताए ।

सरुवा रोग अस्पताल, सडक कालो पत्रे, पक्की पुल झोलुङ्गे पुल, डीप बोरिङ्ग, तटबन्ध, विद्यालय बस, खानेपानी व्यवस्थापन लगायत विभिन्न काम गरेको जनाए । उनले आफूले गरेको प्रतिबद्धताहरु पूरा गरेको दाबी गर्दै विविध समस्याले गर्दा केही बाँकी अधुरा कामलाई पुनः जिते निरन्तरता दिने बताए । छोटो समयमा विकासको काम गर्न सफल भएकोले फेरि प्रदेश सभा सदस्यको उम्मेदवारीले नागरिकहरु खुसी भएको बताए ।

यस्तै क्षेत्र ३ (२) प्रदेश सभा सदस्य उम्मेदवार रजाउ रहमान खाँले एमालेको कामले जनता खुसी भएको बताए । उनले देशमा एमाले नेतृत्वको सरकारको खाँचो रहेको बताउँदै आम जनसमुदायले एमालेलाई जिताउन अपिल गरे ।