खोज

परासी, २९ कात्तिक ।

नेकपा माओवादी केन्द्रका अध्यक्ष तथा पुर्व प्रधानमन्त्री पुष्पकमल दाहाल प्रचण्डले अहिलको चनाव महाभारतको युद्ध जस्तो भएको बताएका छन् । सत्तारुढ दलको गठबन्धनलाई पाँच पाण्डव र केपी ओलीलाई कौरवको संज्ञा दिदै अध्यक्ष प्रचण्डले अहिले पाँच पाण्डव र कौरवको लडाई भएको र पाँच पाण्डवको पक्षमा मतदान गर्न आह्वान गरे । ‘यो चुनाव अन्य समयको जस्तो होईन्, अहिले महाभारतमा जस्तो हो, गठबन्धनका पाँच पाण्डव र ओली सहितको कौरवको गठबन्धनको लडाई हँुदैछ’– प्रचण्डले भने ।

मुलुकको समृृद्धि सुशासन र राजनैतिक स्थायित्व गठबन्धनको एक मात्र एजेन्डा भएको प्रचण्डको भनाई छ । संविधान जारी भएपछि अब सबै खाले आन्दोलन सकिएको भन्ने थियो तर संसद विघटनका कारण आन्दोलन अझै बाँकी रहेको महसुस भएको उनले बताए । संविधान उल्ट्याउन खोज्ने प्रवृत्ति विरुद्ध लड्न गठबन्धन गर्नुपरेको उनको भनाई थियो ।

नवलरासीमा गठबन्धन भित्रको असन्तुष्टि बारे प्रधानमन्त्री देउवाले केही नबोलेपनि प्रचण्डले भने गठबन्धनमा केही समस्या देखिएको र त्यस्लाई समाधान गर्नुपर्ने बताए तर कसरी समाधान गर्ने, प्रदेश सभा तर्फ को उम्मेदवारबारे भने बोलेनन् । गठबन्धनका उम्मेदवारलाई जिताउनुपर्ने बताएपनि माओवादी केन्द्रकै उम्मेदवार विरुद्ध काग्रेसले उम्ेमदवारी दिएको विषयमा प्रचण्डले मुख नखोलेका हुन् ।

सो क्रममा सभामा प्रतिनिधि सभा सदस्य पदका उम्मेदवार उद्योगपति विनोद चौधरीले यस क्षेत्रको समस्या समाधानका लागि आफ्नो उम्मेदवारी भएको स्पष्ट पारे । डुबान कटान लगायत कृषि क्षेत्रमा थुप्रै समस्या देखिएको भन्दै त्यसलाई समाधान गर्ने आश्वासन दिए । यस्तै अर्का प्रतिनिधि सभा सदस्य पदका उम्मेदवार देवेन्द्रराज कंण्डेलले जिल्लामा मल अभावको समस्या जर्जर बन्दै गएको भन्दै शिर्ष नेतृत्वको ध्यानआर्कषण गराए ।

नवलपरासीमै मल कारखाना स्थापना गरेर मल अभावको समस्या समाधान गर्न उनले आग्रह गरे । साथै उनले यस क्षेत्रको डुबान कटानको समस्या दीर्घकालीन रुपमा समाधानका लागि पनि ठुलो आकारको बजेटको माग गरे । हेलिकप्टरबाट नवलपरासी आएका नेताहरु चुनावी सभा सकेपछि दैलेखको दुल्लुमा हुने सभालाई सम्बोधन गर्न त्यस तर्फ प्रस्थान गरेका छन् ।