खोज

सुनवल, २९ कात्तिक ।

चुनावी सभालाई सम्बोधन गर्न प्रधानमन्त्री एवम् नेपाली काँग्र्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्ड मंगलबार पश्चिम नवलपरासी आउँदै छन् । जिल्लामा सत्तारुढ गठबन्धन भित्र खटपट परिरहेका बेला दुई पार्टीका शीर्ष नेता बर्दघाटको चौपत्तामा हुने सभालाई सम्बोधन गर्न आउन लागेका हुन् ।

बिहान १० बजेपछि सभा सुरु हुने बताईएको छ । सभालाई सम्बोधन गर्न नेताद्वय बिहान साढे नौ बजे काठमाण्डौबाट हेलिकप्टरमा आउने कार्यक्रम रहेको छ । चौपताको खेल मैदानमा हुने कार्यक्रमको सुरक्षा व्यवस्था लगायत आवश्यक तयारीका लागि सोमबार जिल्लास्थित सुरक्षा निकायका प्रमुखले स्थलगत निरीक्षण गरेको प्रमुख जिल्ला अधिकारी श्रवण कुमार पोखरेलले जानकारी दिए । प्रतिनिधि सभा निर्वाचन क्षेत्र नम्बर एक मा पर्ने उक्त क्षेत्र बाट काग्रेसका केन्द्रीय सदस्य तथा अर्वपती विनोद चौधरी उम्मेदवार छन् भने प्रदेश सभा १ मा विश्वप्रेम पाठक र २ मा गठबन्धन भित्रकै माओवादी केन्द्र र काँग्रेसका दुई जना नेता चुनावी मैदानमा छन् ।

सत्तागठबन्धनको सहमति विपरित काँग्रेस गएको भन्दै माओवादी केन्द्रले प्रदेश सभा तर्फ देवकरण कलवारको उम्मेदवारी निष्कृय नभए विनोद चौधरीलाई सहयोग गर्न नसक्ने बताउदै आएको थियो । तर केही दिन पहिले घनश्याम यादव सहितका माओवादीका केही नेताहरुले विज्ञप्ती जारी गर्दे माओवादी केन्द्रको सर्मथन विनोद चौधरीलाई हुने बताएका छन् ।

तर उक्त पार्टीबाट प्रदेश सभाका उम्मेदवार तथा पार्टी अध्यक्ष रामानन्द यादवले भने त्यसमा आफ्नो सहमति नरहेको बताएका छन् । यादवले असहमति जनाएपछि उनीहरुले जारी गरेको विज्ञप्तीमाथि पनि प्रश्न चिन्ह खडा भएको छ । स्रोतका अनुसार यादवलाई पनि सहमतिमा ल्याउन कोशिस भईरहेको छ । यो असन्तुष्टि र गन्जागोलका बीच शीर्ष नेताहरु जिल्ला आउनुलाई अर्थपुर्ण रुपमा हेरिएको छ ।