खोज

दाङ, २६ कात्तिक ।

नेकपा एमालेका महासचिव शंकर पोखरेलले प्रदेशको राजधानी पटक पटक तोक्न नमिल्ने बताएका छन् । उनले को व्यक्तिले के बोल्छन, त्यसको अर्थ समेत नभएको बताए ।

दाङ क्षेत्र नं. २ का प्रतिनिधिसभा उम्मेदवार समेत रहेका पोखरेलले शनिबार आयोजित कार्यक्रममा यस्तो बताएका हुन् । ‘संविधानले प्रदेशको राजधानी एक पटक तोक्ने व्यवस्था गरेको छ । त्यो अनुरुप लुम्बिनी प्रदेशको राजधानी दाङको देउखुरी उपत्यकामा तोक्ने काम प्रदेशसभाले गरिसकेको छ’, घोराही उपमहानगपालिकाका बिभिन्न वडामा शनिवार भएको कार्यक्रममा महासचिव पोख्रेलले भने, ‘ तोकेको राजधानीलाई कार्यान्वयन गर्नुको विकल्प छैन ।’

कस्ले के भन्छ त्यसको पछि नलाग्न पनि उनले आग्रह गरेका छन् । उनले राजधानी कार्यान्वयनको लागि आफू मुख्यमन्त्री भएको बेला योजनाहरु अघि सारेको समेत बताए । ‘हामीले राजधानी कार्यान्वयनको लागि योजना ल्याएका थियौ । तर गठबन्धन सरकारले त्यसलाई कार्यान्वयन गर्न सकेको छैन’ महासचिव पोख्रेलले भने ।

२०७४ सालमा दाङ क्षेत्र नं २(१) का प्रदेशसभा सदस्यमा निर्वाचित भएर मुख्यमन्त्री बनेका पोख्रेलले चौतर्फी प्रतिकूलताबीच प्रदेश राजधानी बुटवलबाट दाङ सार्न सफल भएका थिए । संघीय सरकारले तोकेका ७ वटा प्रदेशका अस्थायी राजधानीमध्ये ६ वटा साविककै स्थानमा रहेका बखत पोखरेलले मात्रै राजधानी गृहजिल्ला सार्न सकेका थिए ।

‘राजधानी कार्यान्वयनको लागि सहरीकरणसँगै पूर्वाधारका धेरै योजना ल्याएका थियौ’ उनले भने, ‘तर गठबन्धन सरकार निर्माण भएपछि कार्यान्वयनमा विलम्ब भएको छ ।’ उनले राजधानीको विषय कुनै मजाकको विषय नभएको समेत बताए । मतदाता भेटघाटमा उम्मेदवार पोख्रेलले जिल्लाको विकासको लागि योग्य उम्मेवारलाई चुनाव जिताउन अनुरोध समेत गरे ।

‘प्रतिकुलताका बीचमा पनि प्रदेश राजधानी जिल्लामा ल्याउनेदेखि अन्य विकासका आधार खडा गरेका छौ’ उनले भने ‘त्यो भएर निर्वाचनमा मतदाताले योग्य र काम गर्न सक्नेलाई छनौट गर्नु पर्छ ।’ निर्वाचनको मिति नजिकिएसंगै महासचिव पोखरेलले भेटघाटको कार्याक्रमलाई तीव्र पारेका छन् ।