खोज

पाल्पा, १७ माघ ।

सरकारले १५ शैयाको अस्पताल बनाउने भनेर घोषणा गरेका स्थानीय तहमा पूर्वाधार निर्माण कार्य कछुवा गतिमा अगाडि बढेको छ । सरकारले प्रत्येक स्थानीय तहमा १५ शैयाको डाक्टर सहितको अस्पताल निर्माण गरी ग्रामीण क्षेत्रका जनताको स्वास्थ्यमा सहज पहँुच पुग्ने गरी अस्पताल निर्माण गर्ने भनिए पनि प्रयाप्त मात्रामा बजेट नहुँदा पूर्वाधार निर्माणको कार्य कछुवाको गतिमा अगाडि बढेको छ ।

जिल्लाको १० स्थानीय तहमध्ये रैनादेवी, रिब्दीकोट, तिनाउ, गाउँपालिकाले भौतिक पूर्वाधारका लागि आवश्यक जमिन उपलब्ध गराउन नसक्दा निर्माण कार्य थालनी भएको छैन । तानसेन र रामपुर नगरभित्र सरकारी अस्पताल भएका कारण नयाँ अस्पताल निर्माण कार्य भएन । सरकारले स्थानीय निकायमा अस्पताल निर्माण गर्नुको सट्टामा भएका स्वास्थ्य संस्थाहरुमा दरबन्दी अनुरुप स्वास्थ्य प्रविधिक र प्रयाप्त मात्रामा औषधी उपलब्ध गराएको भए यो प्रभावकारी हुन्थ्यो । गाउँ बसाइसराइले रित्तिएको स्थानीय स्वास्थ्यकर्मीहरु बताउछन् ।

रिब्दीकोट गाउँपालिकाको खस्यौलीमा र रम्भा गाउँपालिकाको ताहुमा प्राथमिक स्वास्थ्य केन्द्र सञ्चालनमा आएका छन् । तर रम्भा गाउँपालिकाले ताहुको बाहुन डाडामा ०८३ सालको भदौ ५ गते भित्र सम्पन्न गर्ने गरी अस्पतालको भौतिक पूर्वाधार निर्माणका लागि १६ करोड ३७ लाखमा ठेक्का सम्झौता गरेको छ । भएको स्वास्थ्य सस्थाहरुमा दरबन्दी अनुरुप स्वास्थ्यकर्मी र प्रर्याप्त मात्रामा औषधी नभएको स्थानीय नविन कार्की बताउँछन् । जिल्लामा २ वटा अस्पताल छन् । पाल्पा अस्पताल र रामपुर अस्पताल । विशेषज्ञ डाक्टरको दरवन्दी भएपनि हाल सम्म दरवन्दी अनुरुपको डाक्टर पठाउन तर्फ सरकारले कुनै दिन पहल नगरेको अस्पताल प्रशासनले जनाएको छ । अस्पताल प्रशासनका एक कर्मचारीका अनुसार २ वटा ठूला भनिएका सरकारी अस्पतालमा विशेषज्ञ सेवा उपलब्ध गराएको भए गाउँगाउँमा अस्पताल आवश्यक नपर्ने रामपुर नगरका स्वास्थ्य प्राविधिक गिरीराज घिमिरे बताउँछन् ।

निस्दी गाउँपालिकामा १६ करोड ६८ लाख रुपैयाँको लागतमा भवन निर्माणको कार्य अगाडि बढेपनि २ वर्ष पुरा भयो प्रस्तावित रकम जति आउनु पर्ने थियो त्यति मात्रामा आउन नसक्दा निर्माण कम्पनीलाई काममा ताकेता गर्न नसकिएको जनप्रतिनिधिहरु बताउँछन् । भवन निर्माणको कार्य निर्माण कम्पनीले भन्दा सरकारकै कारण ढिलाई भएको उनीहरु बताउँछन् । बसाईसराई थला परेको यस पालिकामा धेरै वडाका स्वास्थ्य संस्थामा सुविधा सम्पन्न छन् । यहाँ ठूलो अस्पताल आवश्यक नै थिएन । यो लगानी बालुवामा पानी जस्तै भएको पुर्व जनप्रतिनिधि गगनकुमार सोती बताउँछन् ।

वगनासकाली गाउँपालिका सदरमुकाम तानसेनसंग जोडिएको छ । यस क्षेत्रका अधिकांश मानिसहरु आवश्यक उपचारका लागि मिसन अस्पताल नै जाने गर्दछन् । यो पनि बसाईसराईबाट प्रभावित भएको स्थानीय तह हो । यहाँ पनि सरकारले उद्घोष गरेको अस्पताल प्रभावकारी हुन नसक्ने स्थानीयहरुको भनाइ छ । अस्पतालकोे भौतिक पुर्वाधार ७० प्रतिशत मात्र पूरा भएको स्थानीय सरकारका प्रमुख सरस्वती चिदी बताउँछिन् । माथागढी गाउँपालिकाको आठ वडा मध्ये एक वडामा मात्र वर्थिङ सेन्टर छैन । बाँकी सबै वडामा सुविधा सम्पन्न स्वास्थ्य सस्था भएपनि दरबन्दीअनुरुप प्राविधिक नभएको यस स्थानीय निकायमा १२ करोड ५० लाखमा भवन निर्माणको क्रममा रहेको छ । स्थानीय तहमा प्रशासकीय तहको कर्मचारी नहुदा स्वास्थ्य प्राविधिक वडा सचिवको भूमिकामा रहेको प्राविधिकहरु बताउँछन् ।