खोज

काठमाडौं, ९ माघ ।
आईसीसी १९ वर्षमुनिको महिला टी-२० विश्वकप क्रिकेटमा नेपाल अस्ट्रेलियासँग ८३ रनको फराकिलो अन्तरले पराजित हुँदै समूह चरणबाट बाहिरिएको छ।

अस्ट्रेलियाले दिएको १४० रनको लक्ष्य पछ्याउन मैदानमा उत्रिएको नेपालले २० ओभरमा ८ विकेट गुमाउँदै केवल ५६ रन मात्रै बनाउन सक्यो। नेपालका कप्तान पूजा महतोले सबैभन्दा बढी १८ रन बनाइन्, जबकि अन्य खेलाडीहरू दहोरो अंकमा पनि पुग्न सकेनन्। अस्ट्रेलियाका हसरत गिल, जुलिटी मोर्टन र लिली बेसिंगथवाइटले २/२ विकेट लिए।

यसअघि, मलेसियाको बाङ्गीस्थित यूकेएम क्रिकेट मैदानमा टस जितेर ब्याटिङ गरेको अस्ट्रेलियाले २० ओभरमा ६ विकेट गुमाएर १ सय ३९ रन बनाएको थियो। अस्ट्रेलियाका काओइम्हे ब्रेले ४५ रन बनाइन्। नेपालका कप्तान पूजा महतोले ३, सिमाना केसीले २ र रिया शर्माले १ विकेट लिए।

नेपालको यो लगातार तेस्रो हार हो। नेपालले पहिलो खेलमा बङ्गलादेशसँग ५ विकेट र दोस्रो खेलमा स्कटल्यान्डसँग १ विकेटले पराजित भएको थियो। नेपाल रहेको समूह ‘डी’ बाट अस्ट्रेलिया, बङ्गलादेश र स्कटल्यान्ड ‘सुपर-सिक्स’ मा पुगेका छन्।

नेपालले पहिलो पटक १९ वर्षमुनिको महिला टी-२० विश्वकप खेलेको हो। प्रतियोगितामा १६ वटा टोलीलाई चार समूहमा विभाजन गरिएको छ, जसका प्रत्येक समूहका शीर्ष तीन टोली ‘सुपर-सिक्स’ मा पुग्नेछन्। १९ वर्षमुनिको महिला टी-२० विश्वकपको फाइनल माघ २० गते खेलिनेछ।