खोज

बुटवल, ३ माघ । सुनवलमा सम्पन्न प्रथम जेनिथ कप २०८१ खुला नकआउट फुटबल प्रतियोगिता आयोजक जेनिथ क्लबले चुमेको छ । जेनिथ युथ क्लबको आयोजनामा विहिबार भएको फाईनल खेलमा सुनवल वडा नं ३ लाई २–१ गोल अन्तरले पराजित गर्दै जेनिथ क्लब विजेता बनेको हो । उपाधिसंगै जेनिथले नगद १ लाख १ हजार १ सय ११ रुपैया, कप, मेडल, प्रमाणपत्र हात पारेको छ । उपविजेता वडा नं ३ भने नगद ५५ हजार ५ सय ५५ रुपैया, कप, मेडल, प्रमाणपत्रमा चित्त बुझायो ।

प्रतियोगितामा जेनिथका सुजित बुढाथोकि सर्वोत्कृष्ट खेलाडी, जेनिथका सैलेश बहादुर शाही उत्कृष्ट गोलकिपर, कमल भटटराई उत्कृष्ट डिफेन्स, वडा नं ३ का पुर्ण बहादुर गुरुङ सबि हाई स्कोररबाट पुरस्कृत भए ।

जेनिथ फुटबल मैदानमा निक्कै प्रतिस्प्रर्धात्मक खेलमा जेनिथ युथ क्लबका आशिष श्रेष्ठले खेलको १८ औ मिनेटमा हेडमार्फत गोल गरे । अनिल खड्काले गरेको कर्नर प्रहारलाई आशिषले डिबक्सबाट हेड गरेका थिए । वडा नं ३ का रोजल दाहालले बराबरी गोल गरे। खेलको अन्तिम समयमा जेनिथका अनिल खड्काले विजयी गोल गरे । खेलमा जेनिथका अनिल खड्का म्यान अफ दी म्याच घोषित भए ।

एक समारोहका बिच सुनवल नगरपालिकाका नगरप्रमुख बिमला अर्याल, अखिल नेपाल फुटबल संघका केन्द्रिय उपाध्यक्ष दीर्घ बहादुर केसी (कुमार), सुनवल नगरपालिकाका प्रमुख प्रशासकिय अधिकृत शेषकान्त पौडेल, जिल्ला फुटबल संघ नवलपरासीका कार्यबाहक अध्यक्ष ज्ञानु गुरुङ, क्लबका अध्यक्ष निकेश गुरुङ, क्लबका उपाध्यक्ष छबिलाल गुरुङले विजेता, उपविजेता तथा उत्कृष्ट खेलाडीहरुलाई पुरस्कार वितरण गरेका छन ।

कार्यक्रममा सुनवल नगरपालिकाका नगरप्रमुख बिमला अर्यालले खेलाडीहरुलाई प्रोत्साहन हुने गरि आयोजना गरिएको प्रतियोगिता उत्कृष्ट भएको बताईन । खेल र खेलाडीको उदगम स्थलको रुपमा सुनवलले पहिचान बनाएको उनले दाबी गरे । युवा खेलाडी उत्पादनको पक्षमा यहाका खेल आवद्घ संस्थाहरु लागेको उनले बताईन । प्रतियोगिता पुसको १७ गते शुरु भएको थियो ।