नाइजेरिया, २९ पुस ।
अफ्रिकी देश नाइजेरियाको उत्तरपश्चिमी राज्य जाम्फारामा आइतबार भएको सैन्य हवाई आक्रमणमा १६ जनाको मृत्यु भएको छ।
अन्तर्राष्ट्रिय समाचार संस्थाका अनुसार, एक पाइलटले स्थानीय जनतालाई गल्तीले आपराधिक गिरोह ठान्दै आक्रमण गर्दा १६ सर्वसाधारणको ज्यान गएको हो।
नाइजेरियाली सेना लामो समयदेखि यस क्षेत्रमा आपराधिक गिरोहसँग लडिरहेको छ, जसलाई स्थानीय भाषामा “डकैत” भनिन्छ। यी गिरोहले गाउँहरूमा लुटपाट, फिरौतीको लागि अपहरण र घर जलाउने काम गर्छन्, जसको कारण यहाँका मानिसहरूले आत्मरक्षाका लागि बन्दुक धारण गरेर अपराधीलाई धपाउने गरेका छन्।
शनिबार जाम्फाराको डांगेबे गाउँमा लुटेराले जनावर लुटेर लगेपछि गाउँलेहरूले उनीहरूको विरोध गरेका थिए। पछि, लुटेराहरूलाई लखेट्दै गर्दा टुङ्गर कारा गाउँ नजिकै लडाकू विमानले गल्तीबाट उनीहरूको माथि हवाई आक्रमण गरेको हो।
एम्नेस्टी इन्टरनेशनलले घटनामा मृत्यु हुनेको संख्या २० पुगेको बताएको छ। नाइजेरियाली अधिकारीहरूलाई यस हवाई आक्रमणको तत्काल र निष्पक्ष छानबिन गर्न आग्रह गरिएको छ। यो घटनामा मृत्यु हुनेको संख्या अझै बढ्न सक्ने अनुमान गरिएको छ।
