खोज

बुटवल, २८ पुस । रुपन्देहीमा जारी शुद्धोधन गाउँपालिका १२ औँ फर्साटिकर कप २०८१ को अन्तिम क्वाटरफाइनलमा गोर्खा ब्वाइज क्लब विजयी हुदै सेमीफाईनलमा स्थान बनाएको छ । शनिबार भारत आसामको इन्टर नर्थ इष्ट एफसीलाई ५–१ ले पराजित गर्दै अन्तिम चारमा स्थान बनाएको हो । योसंगै प्रतियोगिताको सेमीफाईनल समीकरण पुरा भएको छ । आयोजक फर्साटिकर युवा क्लब, नवलपरासीको भैरव एफसी र अभिषेक चर्च एफसी यसअघि नै सेमिफाइनलमा स्थान बनाएको छ । गोर्खा ब्वाइजले सोमबार दोस्रो सेमीफाईनलमा अभिषेक चर्चसंग सामना गर्ने छ ।

आईतवार हुने पहिलो सेमिफाइनलमा आयोजक फर्साटिकर युवा क्लब र भैरव एफसीबिच प्रतिस्पर्धा हुने क्लबका अध्यक्ष मुकेश कुँवरले जानकारी दिए । फर्साटिकर खेलमैदानमा शनिबार भएको खेलमा गोर्खा ब्वाइजको जितमा फागुराम थारुले २, निशान्त न्यौपाने, सन्दीप केसी र मनिष तामाङले समान १–१ गोल गरे । इन्टर नर्थका टिएच चेन्ङलेले सान्त्वना गोल गरे । खेलमा गोर्खा ब्वाईजका फागुराम थारु प्लेयर अफ दि म्याच घोषित भएका थिए ।

माघ २ गतेसम्म चल्ने प्रतियोगिताको विजेताले नगद ३ लाख ५ हजार रुपैया, उपविजेताले १ लाख ५० हजार ५ रुपैयासहित कप, प्रमाणपत्रबाट पुरस्कृत हुने आर्थिक संयोजक सिद्धान्त भट्टराईले बताए । विहिबार तेस्रो क्वाटरफाईनल खेलमा देवदह ब्याईज रुपन्देहीले आयोजक फर्साटिकर युवा क्लबसंग सामना गर्ने छ ।