खोज

बुटवल, २७ पुस ।
रूपन्देहीको तिलोत्तमा नगरपालिकाको आयोजनामा शुक्रबारबाट नगरस्तरीय शिक्षक कर्मचारी भलिबल प्रतियोगिता शुरु भएको छ । सामुदायिक विद्यालयमा कार्यरत शिक्षक कर्मचारीहरूबीच आयोजित प्रतियोगितामा १६ समुहको सहभागिता रहेको छ ।
शुक्रबार भएकोे खेलबाट शान्ति नमुना मावि र गीर्वाण मावि सेमिफानलमा प्रवेश गरेका छन् । शान्ति नमुना माविले जनता मावि मोहनाजोतलाई २–० को सेटमा र गीर्वाण माविले शंकरनगर दुर्गादत्त माविलाई २–० सेटमा हराँउदै सेमिफानलको यात्रा तय गरेका हुन् ।
यस्तै सेमराबजार मावि, जनज्योती मावि, जनहित मावि र जनभावना मावि क्वाटर फाइनलमा प्रवेश गरेका छन् ।
शान्ति नमुना माध्यमिक विद्यालयको व्यवस्थापनमा सञ्चालित प्रतियोगिताको तिलोत्तमा नगरपालिकाका प्रमुख रामकृष्ण खाँणले उद्घाटन गरेका थिए । कार्यक्रममा बोल्दै उनले खेलले स्वास्थ्य राम्रो बनाउने मात्र नभई व्यक्तिलाई अनुशासित र मेहनती बनाउन पनि मद्दत गर्ने भएकोले नगरपालिकाले खेलकुदलाई प्राथमिकतामा राखेको बताए ।
कार्यक्रममा तिलोत्तमाका उपप्रमुख जागेश्वरीदेवी चौधरी, वडा नं ५ का अध्यक्ष रमेश डुम्रे, शिक्षा शाखा प्रमुख गंगाराम आचार्य, नेपाल पौडी संघका केन्द्रीय वरिष्ट उपाध्यक्ष जयप्रकाश भट्टराई, तिलोत्तमा खेलकुद समितिका अध्यक्ष लोक पुन, विद्यालयका सल्लाहकारहरू लक्ष्मण खनाल, टेक बहादुर थापा, अर्जुनराज उपाध्याय लगायतले खेलाडीहरूलाई शुभकामना दिएका थिए । प्रतियोगिताको विजेता विद्यालयले नगद १९ हजार ९ सय ९९ सहित ट्रफि, मेडल र प्रमाणपत्र प्राप्त गर्नेछ भने द्वितीय हुने विद्यालयले १५ हजार ५ सय ५५ रूपैया, तृतीय हुने विद्यालयले ११ हजार १ सय ११ रूपैया र चौथो हुने विद्यालयले ७ हजार ७ सय ७७ रूपैया नगद सहित ट्रफि, मेडल र प्रमाणपत्र प्राप्त गर्ने आयोजकले जनाएका छन् ।