खोज

वाशिङ्टन डिसी, अमेरिका।

पत्रकारहरूको स्वतन्त्र, साझा, र छाता सङ्गठनका रूपमा अन्तर्राष्ट्रिय पत्रकार महासङ्घ अमेरिका (International Journalists Federation America, IJFA) गठन भएको छ । अमेरिकाको कानुन अनुसार स्थापना गरिएको यो संस्था अन्तर्राष्ट्रिय स्तरमा पत्रकारिता क्षेत्रको विकास र पत्रकारहरूको हकहितका लागि कार्य गर्न स्थापित भएको छ । प्रधान कार्यालय भर्जिनियामा रहेको यस महासङ्घले संसारभर शाखाहरू स्थापना गरी पत्रकारहरूको सञ्जाल विस्तार गर्ने महत्वाकांक्षी योजना अघि सारेको छ ।

महासङ्घले नेपालसहित विभिन्न देशहरूमा शाखा स्थापना गर्ने घोषणा गरेको छ । आगामी दिनमा नेपाल, बेलायत, अस्ट्रेलिया, जापान, क्यानाडालगायत अन्य देशहरूमा शाखा निर्माण गरिने र स्थानीय पत्रकारहरूसँग सहकार्य गर्दै महासङ्घलाई अन्तर्राष्ट्रिय रूपमै विस्तार गर्ने लक्ष्य लिइएको छ । यसका लागि सम्बन्धित देशका पेशागत पत्रकारहरूलाई महासङ्घसँग सम्पर्क गर्न आग्रह गरिएको छ ।
महासङ्घले पेशागत पत्रकारितालाई प्राथमिकता दिँदै स्वतन्त्र, निष्पक्ष, र पारदर्शी ढंगले काम गर्ने प्रतिबद्धता जनाएको छ । यसमा विभिन्न महादेशका पत्रकारहरूको प्रतिनिधित्व गराउने उद्देश्यले कार्यसमिति र बोर्ड अफ डाइरेक्टरहरूलाई बिस्तार गर्दै लगिने योजना छ ।
महासङ्घको अध्यक्षमा रामप्रसाद खनाल चयन हुनुभएको छ । उहाँ नेपाल मदर डट कमका प्रधान सम्पादक र एभेन्ज्युज खबर टेलिभिजनका अमेरिका सम्पादक हुनुहुन्छ । लामो समयदेखि पत्रकारिता क्षेत्रमा सक्रिय खनाल रेडियो नेपाल, नेपाल टेलिभिजनलगायत राष्ट्रियस्तरका मिडियामा कार्य अनुभव भएका वरिष्ठ पत्रकार हुनुहुन्छ ।
यस्तै महासंघका उपाध्यक्षहरुमा अखण्ड भण्डारी, अन्नपूर्ण राष्ट्रिय दैनिकका प्रधान सम्पादक, जीवराम भण्डारी, योहो टेलिभिजनका प्रमुख, केदार कोइराला, एभेन्ज्युज खबर टेलिभिजनका समाचार प्रमुख, टङ्क पन्त, नेपाल समाचारपत्रका पूर्व सम्पादक र जनता टेलिभिजनका समाचार प्रमुख, सतिश चापागाईँ, अमेरिकाबाट प्रकाशित नेपलिज डायस्पोराका प्रधान सम्पादक चयन भएका छन् ।
महासचिवको भूमिकामा टङ्क दाहाल रहनुभएको छ, जसले खोज पत्रकारितामा आफ्नो नाम स्थापित गर्नुभएको छ । सचिवको जिम्मेवारी अनिल अधिकारी लाई दिइएको छ । कोषाध्यक्षमा अर्जुन दाहाल, डिसी नेपालका अमेरिका ब्युरो चिफ रहनुभएको छ ।
महासङ्घको बोर्ड अफ डाइरेक्टरमा वरिष्ठ पत्रकारहरूको समावेशी सहभागिता गरिएको छ । विश्वराज थापा, इनेप्लिज डट कमका प्रधान सम्पादक, नवराज कुँवर, बुटवल टुडे राष्ट्रिय दैनिकका प्रबन्ध सम्पादक र सूचना प्रविधि क्षेत्रमा विगत लामो समयदेखि सक्रिय, दिनेश कार्की, स्वतन्त्र पत्रकार, कृष्णराज खनाल, गोरखापत्रमा सह सम्पादक, अनिल थापा, क्यानाडाबाट नमस्ते रेडियोका सञ्चालक, सुमन दाहाल, चलचित्र र कलाकारिता सम्बन्धी पत्रकारितामा निपुण, सुरेन्द्र सापकोटा, अस्ट्रेलियाबाट सक्रिय पत्रकार रहेका छन् ।
महासङ्घले नेपाली पत्रकार मात्र नभई विभिन्न देशका पेशागत पत्रकारहरूलाई पनि समेट्ने लक्ष्य लिएको छ । यसले जुनसुकै देशका पेशागत पत्रकारलाई आबद्ध गराउने विधान निर्माण गरेको छ ।

 यसै गरी कान्तिपुर राष्ट्रिय दैनिकका संस्थापक प्रधान सम्पादक एबम अग्रज पत्रकार योगेश उपाध्याय, हिमालय टाइम्स राष्ट्रिय दैनिकका प्रधान सम्पादक, नेपालबाणी, राष्ट्रपुकारका पूर्व प्रधान सम्पादक एबम राससका पूर्व अध्यक्ष तथा महाप्रबन्धक अग्रज पत्रकार प्रा. पुरुषोत्तम दाहाल, मोफसलका अग्रज पत्रकार, दैनिक पत्र, जन सङ्घर्ष, स्वाधीनका प्रधान सम्पादक एबम राससका पूर्व अध्यक्ष डा. बाल कृष्ण चापागाईँ, गोरखापत्र संस्थान तथा राससका पूर्व अध्यक्ष, जनहित, विमर्शका पूर्व सम्पादक, अग्रज पत्रकार पुरु घिमिरे, कान्तिपुर दैनिक देखी विभिन्न मिडियाहरू हुँदै हाल हिमालय खबरका प्रधान सम्पादक समेत रहनुभएका वरिष्ठ पत्रकार विजय घिमिरे महासङ्घको सल्लाहकार रहनुभएको छ ।
महासङ्घले संसारभरका पत्रकारहरूलाई सञ्जालमा आबद्ध गरी पत्रकारितालाई थप सशक्त र प्रभावकारी बनाउने योजना अघि सारेको छ । यसले पत्रकारहरूको हकअधिकार संरक्षण मात्र नभई अन्तर्राष्ट्रियस्तरमा नेपाली पत्रकारिताको पहुँच बढाउने विश्वास गरिएको छ ।