खोज

गाजा, २२ पुस।

गाजा स्ट्रिपमा शासन गर्दै आएको प्यालेस्टिनी समूह हमास ले इजरायलका ३४ बन्दी रिहा गर्न सहमति जनाएको छ। यो निर्णय इजरायलसँगको युद्धविराम सम्झौताअन्तर्गत गरिएको हो।

प्यालेस्टिनी सञ्चारमाध्यमहरूको अनुसार, युद्धविरामको एक भागको रूपमा हमासले यी ३४ बन्दीहरूलाई रिहा गर्ने तयारी गरेको जनाएको छ। यसका कारण, मध्यपूर्वमा शान्ति स्थापना हुने सम्भावना बढेको आकलन गरिएको छ।

अन्तर्राष्ट्रिय सञ्चारमाध्यमहरूले अज्ञात हमास अधिकारीको भनाइ उद्धृत गर्दै भनेका छन् कि, गाजामा रहेका यी बन्दीहरूलाई रिहा गर्नका लागि बन्दी आदानप्रदान सम्झौताको पहिलो चरण अनुमोदित भएको छ। यस प्रारम्भिक आदानप्रदानमा ३४ जना महिलाहरू, बालबालिका, वृद्धवृद्धा र बिरामी बन्दीहरू समावेश हुनेछन्।

अब युद्धविराम सम्झौतामा इजरायलको तर्फबाट स्थायी युद्धविराम र गाजा क्षेत्रबाट फिर्ता हुने सम्बन्धमा कस्तो धारणा राखिन्छ, सोही आधारमा कैदी आदानप्रदानको प्रक्रिया अघि बढ्नेछ।

इजरायलका प्रधानमन्त्री बेन्जामिन नेतान्याहू को कार्यालयले आइतवार भनेको छ कि, हमास ले बन्दीहरूको सूची उपलब्ध गराएको छ। यो सूची कतारमा भइरहेको युद्धविराम सम्झौतासम्बन्धी वार्ताको क्रममा प्रस्तुत गरिएको हो, जसमा हमास र इजरायलले दुईतर्फी प्रस्ताव पेश गरेका छन्।