खोज

बुटवल, १९ पुस । क्रिकेट खेल र खेलाडीलाई प्रोत्साहन गर्ने उदेश्यका साथ रुपन्देहीमा पृथ्वी कप २०८१ खुला टेनिस बल क्रिकेट प्रतियोगिता शुरु भएको छ । पृथ्वी नारायण शाह स्र्पोटस फाउण्डेसन बुटवलको आयोजनामा शुक्रबार भएको उद्घाटन खेलमा देविनगर-११ ब्याईजले विजयी शुरुवात गरेको छ । देवदह क्रिकेट युनिटमाथि देविनगरले १ रनको जित निकालेको हो ।

बुटवल उपमहानगरपालिका वडा नं. १६ स्थित क्रिकेट मैदानमा भएको खेलमा टस जितेर ब्याटिङ रोजेको देविनगरले १६ ओभरमा ७ विकेटको नोक्सानीमा ६० रनको लक्ष्य खडा गरेको थियो । देविनगरका जगत क्षेत्रीले २७ बलमा १४ तथा सन्दिप खत्रीले १६ बलमा १२ रन जोडेका थिए । देवदहका बिनोद क्षेत्रीले ३ ओभरमा ७ रन खर्चेर २ तथा कमल जैसीले ३ ओभरमा १५ रन खर्चेर २ विकेट लिएका थिए ।

कम स्कोर पछ्याएको देवदहका ब्याट्सम्यान १५.६ ओभरमा केवल ५९ रनमा समेटियो । देवदहका कुनै पनि ब्याट्सम्यान दोहोरो अंकको रन जोड्न सकेनन । ओपनर प्रकाश भण्डारीले १३ बलमा ९ रन, हेमन्त थापाले १६ बलमा ९ रनको योगदान दिए ।

देविनगरका सुजन गौतमले ३ ओभरमा ८ रन खर्चेर ४ तथा सुरज सिहले समान ३ ओभरमा ९ रन खर्चेर २ बिकेट लिएका थिए । खेलमा देविनगरका सुजन गौतम म्यान अफ दी म्याचबाट पुरस्कृत भएको खेल संयोजक राजु रानाले बताए ।

एक समारोहका बिच बुटवल उपमहानगरपालिका वडा न. १६ का वडाअध्यक्ष कृष्ण प्रसाद पौडेल, फाउण्डेसनका अध्यक्ष निरज प्रताप खाडले एम्पायरलाई बल हस्तान्तरण गर्दै प्रतियोगिताको उद्घाटन गरेका थिए ।