खोज

चन्द्रौटा(कपिलवस्तु), २२ कात्तिक ।

कपिलवस्तु क्षेत्र नम्बर ३ का प्रतिनिधि सभा सदस्य उम्मेदवार मंगल प्रसाद गुप्ताले अब जनताले साम्प्रदायिक कुरामा आएर कसैलाई पनि भोट दिने अवस्था नरहेको बताएका छन् । उनले अहिले जनताहरु आजाद भइसकेको बताउँदै जनताले भ्रममा नपर्ने बताए ।

जात, धर्मका आधारमा मतदाताले उम्मेदवारलाई भोट दिन नहुने जिकिर गर्दै मतदाताले विकासको आधारमा नेकपा एमालेका उम्मेदवारलाई भोट दिने मानसिकता बनाएको उम्मेदवार गुप्ताले बताए ।

मंगलबार नेपाल मुस्लिम इत्तेहाद संगठन शिवराज नगर कमिटीको बैठकमा उनले यस्तो बताएका हुन् । उनले नागरिक स्वतन्त्र भइसकेकोले कसैको दबाबमा नपरेर देश विकास र समृद्धिका विकासप्रेमी नेतालाई भोट हाल्न आग्रह गरे । मुस्लिम समुदायका हकअधिकारका लागि आवाज बुलन्द गर्न नेकपा एमाले प्रतिबद्ध रहेको उनको भनाई छ ।

यसैगरी प्रतिनिधि सभा समानुपातिक उम्मेदवार सराज अहमद फारुकीले आफ्नो हक अधिकार प्राप्तिका लागि संगठन आवश्यक रहेको बताए । उनले सामुहिक रुपमा संगठित हुँदा बलियो हुनुको साथै आफ्नो अधिकारका लागि सम्बन्धित निकायलाई घचघच्याउन सहज हुने बताउँदै राजनीतिक दलका हिसाबले नेकपा एमाले सबै दलभन्दा गौरवशाली र शक्तिशाली पार्टीको भएको बताए । उनले मुस्लिम समुदायको उत्थानका लागि एमाले आवश्यक रहेको र यो निर्वाचनमा सबैले सुर्य चिन्हमा भोट हालेर जिताउनुपर्ने बताए ।

यस्तै क्षेत्र नम्बर ३ (१) का उम्मेदवार अर्जुन कुमार केसीले नेकपा एमालेले मुस्लिम समुदायका महिलालाई शिक्षाको मूलधारमा ल्याउनका लागि अहम भूमिका खेलेको बताए ।

उनले केपी ओेली नेतृत्वको सरकारले मदरसामा भौतिक पुर्वाधार र शैक्षिक स्तरमा विकासको साथै अनुदान रकमसमेत विनियोजन गरिदिने गरेको बताए । मुस्लिम समुदायलाई शिक्षाको मूलधारमा ल्याउन एमालेले नीति, नियममा रहेर अगाडी सार्ने केसीले बताए ।

यसैगरी क्षेत्र नम्बर ३ (२) का प्रदेश सभा सदस्य उम्मेदवार रजाउ रहमान खाँले मुस्लिम समुदायलाई अगाडि बढ्न आवश्यक रहेको बताए । उनले इत्तेहाद संगठनलाई बलियो बनाउँदै यसै संगठनबाट समुदायको आवाज उठाउनुपर्ने बताए।

उनले देशमै नेकपा एमाले बलियो पार्टीको भएकोले मुस्लिम हक अधिकारका यस निर्वाचनमा सुर्य चिन्हमा एकताबद्ध भएर मतदान गर्न जरुरी रहेकोे बताउँदै एमालेका उम्मेदवारलाई विजयी बनाउन आग्रह गरे ।