काठमाडौं ।
नेपाल प्रिमियर लिग (एनपीएल) मा काठमाडौं गुर्खाजले विराटनगर किंग्सलाई एक विकेटले हराएको छ। ११८ रनको लक्ष्य पछ्याएको काठमाडौंले १८.१ ओभरमा १२० रन बनाउँदै जित हात पारेको हो।
काठमाडौंका लागि प्रतिक श्रेष्ठले ३९ रन बनाएका थिए भने रसिद खानले १४, जेरार्ड एरासमसले १२, माइकल लेभिटले १० र साहव आलमले २ रन बनाएका थिए। भीम सार्की, स्टेफन इस्किनाजी र डान डाउथवेथले समान १ रन जोडे, जबकि करण केसी शून्यमा आउट भए। दिपेश कंडेल ११ रन र शंकर राना १६ रनमा अविजित रहे।
विराटनगरका लागि कप्तान सन्दीप लामिछानेले ३ विकेट लिए भने बसिर अहमद, अनिल खरेल र क्रिश सोलले समान २-२ विकेट हात पारे।
विराटनगर किंग्सले टस हारेर ब्याटिङ सुरु गर्दै ११७ रन बनाएको थियो। विराटनगरका लागि राजेश पुलामी मगरले २५, दिपक बोहरा २०, स्कट एडवार्ड्स १५, बसिर अहमद १३, निकोलश किर्तन १२, लोकेश बम ९, सुवास भण्डारी ६, इस्मत आलम ५, क्रिश सोल १ र सन्दीप लामिछाने शून्यमा आउट भए।
काठमाडौंका जेरार्ड एरासमसले ३ विकेट लिए भने दिपेश कंडेलले २ विकेट हात पारे। डन डाउथवेथ, कप्तान करण केसी र साहव आलमले समान १-१ विकेट लिए।
यो जितसँगै काठमाडौंले ६ खेलमा ३ जित र ३ हार सहित ६ अंक प्राप्त गरेको छ र तालिकाको पाँचौं स्थानमा रहेको छ। विराटनगर भने समान खेलमा ४ अंकसहित छैटौं स्थानमा छ।
