खोज

जितपुर, १४ मंसिर ।
कपिलवस्तुको बाणगंगा नगरपालिकामा तेस्रो नगरस्तरीय खुल्ला महिला ब्याडमिन्टन प्रतियोगिता सुरु भएको छ। लैंगिक हिंसा विरुद्धको १६ दिने अभियानको अवसरमा सुरु गरिएको यो प्रतियोगिता महिला, बालबालिका तथा जेष्ठ नागरिक शाखाले आयोजना गरेको हो। शाखाकी प्रमुख सुसिला पन्थका अनुसार प्रतियोगितामा १४ टोली सहभागी छन्। बिहीबार १२ टोलीको खेल सम्पन्न भइसकेको छ भने शुक्रबार फाइनल खेल हुनेछ।

प्रतियोगिताको उद्घाटन नगरप्रमुख चक्रपाणी अर्यालले गरेका थिए। उद्घाटन कार्यक्रममा बोल्दै उनले लैंगिक हिंसाबारे सचेतना अभिवृद्धि गर्न यो अभियानलाई महत्त्वपूर्ण बताए। लैंगिक हिंसा पुरुष, महिला र यौनिक अल्पसंख्यक सबैमाथि हुनसक्ने भएकाले यसबारे गहिरो रूपमा बुझ्न आवश्यक रहेको उनले उल्लेख गरे।

नगरपालिकाका उपप्रमुख रिताकुमारी चौधरीले बाणगंगाले १६ दिने अभियानलाई विभिन्न कार्यक्रमसहित प्रभावकारी रूपमा मनाउँदै आएको बताइन्। उनले कपिलवस्तुका अन्य पालिकाले अभियानलाई मात्र उद्घाटनमा सीमित राख्ने तर बाणगंगाले विविध गतिविधिसहित सार्थक बनाउने अभ्यास गरेको उल्लेख गरिन्।

खेलमा सहभागी टोलीलाई प्रोत्साहन गर्न पुरस्कारको व्यवस्था गरिएको छ। प्रथम, द्धितीय, तृतीय, र सान्त्वना स्थान प्राप्त गर्ने टोलीले क्रमशः नगद १०,०००, ८,०००, ६,०००, र ४,००० रुपैयाँसहित प्रमाण पत्र प्राप्त गर्नेछन्।

नगरप्रमुखले खेलकुदमा महिलाको सहभागिता बढाउन नगरपालिकाले ठोस योजना बनाएर काम गर्ने प्रतिवद्धता व्यक्त गरे। प्रतियोगिताले महिलालाई स्वास्थ्य र खेलकुदप्रति प्रेरित गर्दै सशक्तिकरणको सन्देश दिने अपेक्षा गरिएको छ।