खोज

बुटवल, १७ कात्तिक ।

सरकारले आफ्नो स्वामित्वमा रहेको नेपाल वायुसेवा निगमको मुख्य विजनेशमा अंकुश लगाउँदै हिमालयन एअरलाइन्सलाई पनि ग्राउन्ड हेन्डलिङको अनुमति दिएको छ । योसँगै ग्राउन्ड हेन्डलिङको सेवामा निगमको एकछत्र राज समेत गुम्ने भएको छ ।

निगमको आम्दानीको मुख्य स्रोत नै ग्राउन्ड हेन्डलिङ रहेको थियो । चुनावको मुखमा सरकारले निगमको बिजनेश खोस्दै हिमालयन एअरलाइन्सलाई ग्राउन्ड हेन्डलिङको अनुमति दिएको हो । ग्राउन्ड हेन्डलिङ सेवाबाटै निगमले कुल आम्दानीको ६० प्रतिशत भन्दा बढी आर्जन गरिरहेको छ ।

वार्षिक करिव चार अर्व रुपियाँ निगमले यसैबाट कमाउने गर्दछ । नागरिक उड्डयन प्राधिकरणले हिामलयन एअरलाइन्सलाई त्रिभुवन अन्तर्राष्ट्रिय विमानस्थलमा सेल्फ र भैरहवामा कमर्सियल ग्राउन्ड हेन्डलिङको जिम्मा दिंदै अनुमति दिएको छ । ग्राउन्ड हेन्डलिङको अनुमति पाएसँगै हिमालयन एअरलाइन्सले बिहीबारबाट गौतमबुद्ध अन्तर्राष्ट्रिय विमानस्थलबाट नियमित उडान थाल्दैछ ।

प्राधिकरणबाट ग्राउन्ड हेन्डलिङको अनुमति पाएको दुई वर्षपछि मात्रै हिमालयन एअरलाइन्सले यो सेवा सुरु गर्न लागेको हो । कोरोना महामारीमा निगमको व्यवसाय खोस्न लागेको आक्षेप लागेपछि प्राधिकरण अनुमति कार्यान्वयन गर्नका लागि हिच्किचिएको थियो । प्राधिकरण अनुमति कार्यान्वयन गर्नका लागि पछि हटेको थियो । कम्पनीले आज बिहीबारबाट मलेसियातर्फ उडान गर्ने तयारी गरिरहेको हिमालयन एअरलाइन्सका उपाध्यक्ष विजय श्रेष्ठले जानकारी दिए । उहाँका अनुसार अव काठमाडौं–मलेसिया, भैरहवा– मलेसिया उडान सुरु हुनेछ ।

कम्पनीले भैरहवाबाट उडान गर्ने वायुसेवा कम्पनीहरुलाई अन्तर्राष्ट्रिय दरभाउमै हवाइ इन्धन उपलव्ध गराइदिन प्राधिकरणसमक्ष आग्रह गरेको छ । श्रेष्ठका अनुसार कम्पनीले एअरबस ३२० को जहाजमार्फत उडान भर्दैछ । हिमालयन एअरलाइन्सयले हप्तामा सातैदिन उडान भर्ने योजना बनाइरहेको छ । विमानस्थलका महाप्रवन्धक गोविन्दप्रसाद दाहालका अनुसार आज दिउँसो १२ बजे हिमालयन एअरलाइन्सको चार्टड उडान भैरहवामा अवतरण हुनेछ ।

हाल यो विमानस्थलमा कुवेतको जजिरा एअरलाइन्सले मात्रै सातामा तीन दिन उडान भर्दै आएको छ । हिमालयन एअरलाइन्समा उपाध्यक्ष श्रेष्ठले गौतमबुद्ध विमानस्थलमा पूर्वाधार बिस्तार हुँदै जाँदा उडान संख्या पनि थप्दै जाने योजना सुनाए ।

नागरिक उड्डयन प्राधिकरणका अनुसार कुवेतको ध्वजावाहक कम्पनी कुवेत एयरले पनि भैरहवाको गौतमबुद्ध अन्तर्राष्ट्रिय विमानस्थलबाट नियमित उडान गर्ने योजना पेश गरेको छ ।