खोज

बुटवल, २४ कात्तिक ।

रुपन्देही जिल्ला तिलोत्तमा नगरपालिकाको मणिग्राममा जन्मे हुर्केका डिल्ली भट्टराई अमेरिकाको हालै सम्पन्न आम निर्वाचनमा क्यालिफोर्नियाको हर्कुलिस नगर परिषद सदस्यमा निर्वाचित भएपछि उनको गृहनगर मणिग्राममा खुशियाली छाएको छ ।

भट्टराई मणिग्रामस्थित शान्ति नमूना माध्यमिक विद्यालयका पूर्व विद्यार्थी भएको र उनी अमेरिकाको क्यालिफोर्नियाको हर्कुलिस नगर परिषद सदस्यमा निर्वाचित भएको सन्देश पाएपछि विद्यालय परिवार एवं मणिग्राम क्षेत्रमा खुशियाली छाएको शान्ति नमुूना माध्यमिक विद्यालयका प्रधानाध्यापक कुल प्रसाद लामिछानेले बताए । भट्टराईको सफलता नेपाल र नेपालीका लागि गौरव र प्रेरणादायी सन्देश भएको लामिछानेको भनाई छ ।

डिल्ली भट्टराईले टेलिफोन सम्पर्कमा आफू मणिग्राममा जन्मे हुर्केको र शान्ति नमूना माविमा पढेको साधारण परिवारको सदस्य अमेरिकाको क्यालिफोर्नियाको हर्कुलिस नगरको परिषद सदस्यमा निर्वाचित हुन सकेकोमा गौरवानुभूति भएको बताए ।

भट्टराई डेमोक्रयाटिक पार्टीका तर्फबाट उम्मेदवार बनेका थिए । चार वर्षे कार्यकालभित्र उनी उक्त नगरको प्रमुख (मेयर) बन्ने अवसर मिल्ने कु्रा पनि भट्टराइले बताएका छन् ।

अमेरिकामा भट्टराई पहिलो नेपाली व्यक्ति मेयर बन्ने पक्का रहेको पनि उनले बताए । भट्टराईका अनुसार उक्त सहरमा कुल २७ हजार जनसंख्या रहेकोमा १७ हजार ५ सय मतदाता थिए । भट्टराई सन २००१ मा २४ वर्ष अघि अमेरिका पु्गेका थिए ।

शान्ति नमूना माविका प्रधानाध्यापक लामिछानेका अनुसार डिल्ली भट्टराई मणिग्रामको प्रतिष्ठित सामाजिक परिवारका सदस्य हुन् । उनका बुवा तिल प्रसाद भट्टराई शान्ति नमूना मावि र गिर्वाण संस्कृत माविका संस्थापक सदस्य हुन् ।