खोज

बुटवल, २० कात्तिक ।

लुम्बिनी प्रदेशका मुख्यमन्त्री चेतनारायण आचार्यले अर्घाखाँचीमा भएको दुर्घटनामा परी घाइते भएकाहरुको स्वास्थ्य अवस्था बारे जानकारी लिएका छन् । बुटवल स्थित चौराह अस्पताल पुगेर मुख्यमन्त्री आचार्यले घाइतेहरुको अवस्था बारे जानकारी लिएका हुन् ।

अर्घाखाँची भुमिकास्थान नगरपालिका वडा नं ६ खिल्जीमा सोमवार साँझ भएको दुर्घटनामा परी घाइते बिरामीहरुसंग भेट गर्दै उनले उपचारमा कुनै कमी नहुनेगरी व्यवस्था मिलाइएको जानकारी दिए ।

बुटवल स्थित चौराह अस्पताल पुगेर मुख्यमन्त्री आचार्यले घाइतेहरुलाई भेट गर्दै स्वास्थ्य अवस्थाबारे जानकारी लिएको मुख्यमन्त्रीको निजी सचिवालयले जनाएको छ । सो क्रममा मुख्यमन्त्री आचार्यले घाइतेहरुको उपचारमा कुनै कमी हुन नदिन स्वास्थ्यकर्मीहरुलाई निर्देशन समेत दिएका छन् । ‘घाइतेहरुको उपचारमा कुनै कमी नहोस् । सबै प्रकारको उपचार सेवा प्रदान गरिनुपर्छ’, चिकित्सकहरुसंग छलफल गर्दै मुख्यमन्त्री आचार्यले भने, ‘घाइतेहरुको उपचारमा कुनै कमी हुन नदिनुहोला ।’

दुर्घटनामा परेर दुई जनाको मृत्यु हुनुका साथै ३४ जना घाइते भएका थिए । घाइतेहरुको हाल अस्पतालहरुमा उपचार भइरहेको छ । भैलो खेलिरहेको समूहकै बीचबाट ना ३ ख २४७१ नम्बरको यात्रुवाहक बस अनियन्त्रित तवरले अघि बढ्दा यो दुर्घटना भएको थियो ।