खोज

बुटवल, १५ कार्तिक । नेपाल सम्वत ११४५ को स्वागतमा बुटवलमा विविध कार्यक्रम गरि मनाइने भएको छ । नेपाल सम्वत सबै नेपालीको साझा सम्बतका रुपमा चिनाउने गरि नेवा देय दबु नगर समितिको मुल आयोजनामा बुटवलका १० वटा खलपुचहरुको सहभागीतामा बुटवल विहिबार दिउसो वृहत मोटरसाईकल रयाली तथा शनिबार सम्मान, शुभकामना आदाप्रदान गरि दुई दिने मनाईने भएको हो ।

विहिबार बुटवलमा पत्रकार सम्मेलन गरि समितिका अध्यक्ष गोपाल श्रेष्ठले सम्पुर्ण तयारी पुरा भएको बताए । शुक्रबार दिउँसो ४ बजे राजमार्ग चौराहाबाट शुरु हुने मोटरसाइकल रयाली बुटवल बजार परिक्रमा गरि योगिकुटी हुदै देविनगरस्थित नेवा सेवा समितिको कार्यालयमा समापन गरिने उनले बताए । रयालीमा करीब ५ दर्जन बढि मोटरसाइकल रयालीमा सहभागी हुने उनले बताए । यसै गरि काठमाण्डौ बाहिर पहिलोपटक नेपाल सम्वतको क्यालेन्डर समेत बिमोचन गर्ने तथा बुटवलमा रहेर नेवार समुदायको भाषा, संस्कृतिमा योगदान दिएका नेवा दे दबुको संस्थापक अध्यक्ष रबिन्द्रगोपाल लाकौललाई सम्मानको कार्यक्रम राखिएको उनले बताए ।

कार्यक्रममा नेवा सेवा समिति देविनगर, भिमसेन सेवा समाज बुटवल–३, भिन्धो नेवा समाज (बुटवल —१७,१८,१९), नेवा संस्कृति संरक्षण समाज देविनगर, भिमसेन सेवा समाज देविनगर, गणेश नेवा समाज देविनगर, नेवा समाज १ र २, नेवा समाज अर्घाखाँची रुपन्देही सहित एक दर्जन बढि यस क्षेत्र १० वटा खलपुचहरु संयुक्त रुपमा गरिने भएको छ ।

नेवा सेवा समिति देविनगरका अध्यक्ष चिरञ्जीवी श्रेष्ठले नेपाल सम्वत सबै नेपालीको साझा सम्वतको रुपमा पहिचान दिने गरि कार्यक्रममा सबैको उपस्थिति हुने बताए । ‘हामीले सबै जातजातीका नेतृत्वहरुलाई सहभागिताको लागि निम्तो दिएका छौ ।’— उनले भने ।