खोज

बुटवल, १२ कार्तिक । पाल्पा दोभानमा जारी दोस्रो दोभान सेभेन ए साईड नकआउट फुटबल प्रतियोगिता २०८१ उपाधिको लागि आयोजक दोभान एफसी र गुड मर्निङ एफसी भिड्ने भएका छन । दोभान फुटबल क्लबको आयोजनामा तिनाउ गाउपालिका वडा नं. २ स्थित दोभान खेलमैदानमा सोमबार भएको पहिलो सेमीफाईनल खेलमा गुड मर्निङ एफसीले चपरहट्टी एफसीलाई पेनाल्टी शुटआउटमा पराजित गर्दै फाईनल भिडन्त पक्का गरेको हो । खेलमा गुड मर्निङका अनुप थापा म्यान अफ दी म्याचबाट पुरस्कृत भए ।

यसैगरि दोस्रो सेमीफाईनल खेलमा आयोजक दोभान एफसीले नवजिवन एफसीलाई ३—२ गोल अन्तरले पराजित गर्दै फाईनल भिडन्त पक्का गरेको हो । खेलमा दोभानका जितेश गुरुङ म्यान अफ दी म्याचबाट पुरस्कृत भए ।

फाईनल खेलमा मंगलबार दिउसो हुने संयोजक सुनिल श्रेष्ठले बताए । प्रतियोगिताको उपाधि विजेतालाई नगद ५० हजार, कप, मेडल, प्रमाणपत्र तथा उपविजेतालाई नगद २५ हजार रुपैया, कप, मेडल, प्रमाणपत्रबाट पुरस्कृत गरिने संयोजक श्रेष्ठले बताए । यसैगरि उत्कृष्ट खेलाडी, हाई स्कारेर, उत्कृष्ट गोलरक्षकलाई जनही दुई—दुई हजार रुपैया, कप, मेडल, प्रमाणपत्रबाट पुरस्कृत गरिने उनले बताए ।

कार्तिक ३ गतेबाट शुरु भएको प्रतियोगितामा २९ टिमले प्रतिस्प्रर्धा गरेको क्लबका अध्यक्ष बिक्रम कुमालले बताए ।