खोज

गुल्मी, १० कार्तिक ।
गुल्मीमा राष्ट्रिय परिचयपत्र वितरण अभियान शुरु गरिएको छ । राष्ट्रिय परिचयपत्र तथा पञ्जीकरण विभागद्वारा गुल्मी जिल्लामा राष्ट्रिय परिचयपत्र (कार्ड) वितरण अभियान शुरु गरिएकोे हो । अभियानको पहिलो दिन प्रमुख जिल्ला अधिकारी कृष्णप्रसाद शर्माले इस्मा गाउँपालिका –२ का ९१ वर्षीय नामदेब खनाल र धुर्कोट गाउँपालिका –२ का ९७ वर्षीय मानबहादुर महतलाई परिचय पत्र प्रदान गरि अभियानको शुभारम्भ गरेका हुन ।

जिल्लाको धुर्कोट गाउँपालिकाको वडा नं १ र २ एवं इस्मा गाउँपालिकाको वडा नं २ बाट परिचयपत्र बितरण शुरु गरिएको प्रमुख जिल्ला अधिकारी शर्माले जानकारी दिए । स्थानीय पालिकाका अध्यक्ष, उपाध्यक्ष, वडाध्यक्ष लगायतको सहभागितामा वडा तहमै पुगेर पचिय पत्र बितरण गर्न थालिएको हो । परिचय पत्र लिनका लागि सदरमुकाम धाउनुपर्ने बाध्यता बनेका नागरिकहरूलाई यो अभियानले ठूलो सहयोग र राहत पुगेको धुर्कोट गाउँपालिका अध्यक्ष भुपाल पोख्रेलले बताए ।
पञ्जीकरण विभागले जिल्लामा यस अघि स्थानीय जनप्रतिनिधि, राजनैतिक दलहरू र सरोकारवालाबीच छलफल तथा अन्तरक्रिया गरि पालिकाहरूमा परिचय पत्र बितरणको समय व्यवस्थापन कसरी सञ्चालन गर्ने भन्ने विषयमा छलफल गरिएको थियो । त्यही छलफलका आधारमा कात्तिक ८ गतेदेखि गुल्मी जिल्लामा वडा तहमै पुगेर राष्ट्रिय परिचयपत्र वितरण गर्न शुरु गरेको हो ।

पञ्जीकरण विभागको उक्त अभियान अन्र्तगत जिल्ला प्रशासन कार्यालयले गुल्मीमा पनि तयार भएर आएका राष्ट्रिय परिचयपत्रहरूलाई वडामै पुगेर बितरण गर्ने काममा स्थानीय पालिकाहरूसँग समन्वय गरेको छ । राष्ट्रिय परिचयपत्र तथा पञ्जीकरण विभागले पहिलो चरणमा धुर्कोट, इस्मा, कालीगण्डकी, र गुल्मीदरबारमा पुगेर परिचयपत्र वितरण गर्न लागेको हो । अन्य पालिकाहरूमा भने तिहारपछि मात्र परिचयपत्र बितरण गरिने कार्यक्रम तय गरिएको छ ।
गुल्मी जिल्लामा राष्ट्रिय परिचयपत्रका लागि हालसम्म एक लाख ९४ हजार ४३२ जनाको विवरण सङ्कलन गरिएकोमा एक लाख ६४ हजार ४२३ जनाको मात्र परिचयपत्रको कार्ड छपाई भएको राष्ट्रिय परिचयपत्र व्यवस्थापन शाखाका निर्देशक तुलसी प्रसाद दाहालले जानकारी दिएका छन । निर्देशक दाहालका अनुसार जिल्ला प्रशासन कार्यालय गुल्मीबाट मात्र ६६ हजार ३१५ जनाको बिवरण सङ्कलन गरिएको छ । बिवरण सङ्कलन गरिएकाहरू मध्य ४० हजार ६९४ जनाको कार्ड छपाई भईसकेको बताईएको छ । जिल्लामा आएका परिचयपत्रहरू मध्य हालसम्म जिल्ला प्रशासन कार्यालयबाट पाँच हजार ४६१ जनालाई कार्ड वितरण भैसकेको छ ।

अभियानको क्रममा जिल्लाको रेसुङ्गा नगरपालिकामा १२ हजार ५४२, मुसिकोट नगरपालिकामा १३ हजार ९०५, कालीगण्डकी गाउँपालिकामा आठ हजार ७८२, सत्यवती गाउँपालिकामा १० हजार ४२२ जनालाई परिचयपत्र (कार्ड) बितरण गरिने बताईएको छ । त्यसैगरी चन्द्रकोट गाउँपालिकामा आठ हजार ९१४, छत्रकोट गाउँपालिकामा १० हजार ५५, गुल्मीदरबार गाउँपालिकामा ११ हजार २५८, इस्मा गाउँपालिकामा नौ हजार ५०, धुर्कोट गाउँपालिकामा १० हजार ३८१, मदाने गाउँपालिकाबाट नौ हजार ३४३ र मालीका गाउँपालिकामा नौ हजार ८५७ जनालाई बितरण गर्ने योजना रहेको विभागले जनाएको छ ।
गुल्मी जिल्लामा राष्ट्रिय परिचयपत्र छापिएर आएको र उक्त कार्ड लिनका लागि पुनः जैविक विवरण चेकजाँच गरी वितरण गर्नुपर्ने भएकाले सम्बन्धित व्यक्तिले नागरिकता, राष्ट्रिय परिचयपत्रको लागि विवरण सङ्कलन गर्दाको सक्कली रसिद अनिवार्य लिएर उपस्थित हुनुपर्ने प्रमुख जिल्ला अधिकारी शर्माले बताए ।