खोज

बुटवल, १३ कात्तिक ।

भैरहवास्थित गौतमबुद्ध अन्तर्राष्ट्रिय विमानस्थलको सञ्चालन खर्च घाटामा जान थालेको भन्दै सरकारले अव भने चार्टड उडान भैरहवालाई दिने भएको छ । गौतमबुद्ध विमानस्थलबाट चार्टड उडान हुने भएपछि यसको सञ्चालन खर्च उठ्ने नेपाल नागरिक उड्डयन प्राधिकरणको भनाई छ ।

यसअघि त्रिभुवन विमानस्थलबाट चार्टर्ड उडान हुँदै आएकोमा अव भने यसलाई प्रतिवन्ध लगाउँदै भैरहवामा चार्टड उडान गर्ने निर्णय गरेको हो । यो निर्णयसँगै त्रिभुवन विमानस्थलको बिजनेश भैरहवाले पाउने भएको छ ।

प्राधिकरणका सूचना अधिकारी ज्ञानेन्द्र भुलले अन्तर्राष्ट्रिय वायुसेवा कम्पनीहरुलाई विन्टर सिजनमा त्रिभुवन विमानस्थलबाट चार्टर्ड उडानको अनुमति नदिने निर्णय गरेको जानकारी दिए । “त्रिभुवन विमानस्थलमा ट्याक्सी–वे विस्तारको काम पनि गर्नुपर्ने छ, त्यसैले सकेसम्म भैरहवामा अन्तर्राष्ट्रिय उडानहरु लैजान खोजिएको हो”–उनले भने ।

यसअघि प्राधिरकणले विदेशबाट आउने चार्टर्ड उडान भैरहवा पठाउन सुरु गरिसकेको थियो । प्राधिकरणले अन्तर्राष्ट्रिय उडान गर्ने नेपाल एयरलाइन्स र हिमालय एयरलाइन्सलाई उडान तालिकामा भैरहवाबाट पनि उड्न बाध्यकारी गराउने गरी त्रिभुवन विमानस्थलबाट हुने केही उडान कटौती गरिदिएको छ । प्राधिकरणले आइतबारदेखि नेपाल एयरलाइन्स र हिमालय एयरलाइन्सलाई त्रिभुवन अन्तर्राष्ट्रिय विमानस्थलमा २–२ वटा अन्तर्राष्ट्रिय उडान भैरहवाबाट गर्न बाध्यकारी व्यवस्था गरेको छ ।

दैनिक तीनभन्दा बढी उडान गर्ने वायुसेवा कम्पनीले पुरानो गन्तव्यमा थप उडान गर्न भैरहवाबाटै उड्नुपर्ने नियम बनाइएको छ । विदेशी वायुसेवा कम्पनीलाई भने १५ डिसेम्बरसम्म भैरहवमा उडान भर्ने तालिका बनाउन समय दिइएको छ ।

यस्तो उडान नगरेमा त्रिभुवन विमानस्थलबाट उडान गर्न नदिने निर्णयअनुसार आइतबार नेपाल एयरलाइन्सको दिल्ली उडान रोकिदिएको छ ।