खोज

बुटवल, २६ भदौ । नेपाल नियमित रक्तदाता संघको आयोजनामा आयोजित बुटवलमा शुरु भएको प्रथम सेभेन ए साईड भेट्रान्स फुटबल प्रतियोगितामा रुपन्देही होटल तथा रेष्टुरेन्ट ब्यवसायी संघ र रुपन्देही ब्यापार संघले विजयी शुरुवात गरेका छन । संघका संस्थापक अध्यक्ष स्वर्गिय सरोज सिलवाल (बन्दी) को १७ औ स्मृति दिवसको अवसरमा आयोजित प्रतियोगिताको उद्घाटन खेलमा होटल ब्यवसायी संघले आयोजक नियमित रक्तदाता संघलाई २–१ ले पराजित गर्दै अन्तिम चारमा स्थान बनायो । यसैगरि दोस्रो खेलमा खेलमा रुपन्देही ब्यापार संघले विद्युतिय ब्यवसायी संघ रुपन्देहीलाई १–० गोल अन्तरले पराजित गर्दै दोस्रो चरणमा प्रवेश गरेको हो ।

सिद्धेश्वर खेलमैदानमा भएको पहिलो खेलको पाचौ मिनेटमा नियमितका आनन्द भट्टराईले गोल गर्दै टिमलाई अग्रता दिलाएका थिए । तर एक मिनेटभित्र होटल ब्यवसायीका सुन्दर श्रेष्ठले आर्कषक गोल गर्दै खेललाई बराबरीमा ल्याए । होटलका भिम बहादुर राईले थप एक गोल गर्दै टिमलाई विजयी गराउन सफल भए ।

यसैगरि निक्कै रोमान्चक दोस्रो खेलमा रुपन्देही ब्यापार संघका प्रेम पाण्डेको एकमात्र गोल निर्णायक भयो । पहिलो हाफ बराबरीमा सकिएपनि दोस्रो हाफमा पाण्डेले डिबक्सबाट गरेको प्रहार गोलमा परिणत भयो ।

प्रतियोगिताको एक समारोहका बिच बुटवल खेलकुद विकास समितिका संयोजक बोनिन पिया, वडा नं ८ का वडाअध्यक्ष यज्ञ प्रसाद पंगेनी, संघका अध्यक्ष दया सिलवाल, वरिष्ठ उपाध्यक्ष लेखनाथ भण्डारी, खेल संयोजक महेश खनालले रेफ्रीलाई बल हस्तान्तरण गरि खेल शुभारम्भ गरेका थिए । यसैबिच स्वर्गिय सिलवालको स्मृतिमा सिद्धेश्वर परिसरमा दीप प्रज्वलन गरिएको थियो ।