खोज

बुटवल, २५ भदौ । विश्व आत्महत्या रोकथाम दिवसको अवसरमा वृहत सचेतनामुलक साईकल रयाली निकालिएको छ । नेपाल मनोचिकित्क संघ, नेपाल सामाजिक मनोचिकित्सक संघ र बुटवल युनाईटेड साईक्लिङ क्लबको आयोजनामा मंगलबार बुटवलमा आत्महत्या रोकथाम दिवसको अवसरमा सचेतनमुलक वृहत साईकल रयाली निकालिएको हो । ‘संवाद शुरु गरौः दृष्टिकोण बदलौ ।’ नारासहित विश्वभर विविध रचनात्मक कार्यक्रम गरि दिवस मनाईदैछ ।

गोलपार्कबाट शुरु भएको साईकल रयालीमा सहभागीहरुले ‘आत्महत्याबाट बच्नुहोस्, जिउनुहोस् । समस्या अस्थायी, जीवन अमूल्य ।’, ‘आत्महत्या समाधान होइन, सहयोग माग्नुहोस् ।’, ‘आत्महत्या गर्ने मानिसहरू सधैं कमजोर हुँदैनन्, उनीहरू कठिनाइमा छन् ।’, ‘मिथः आत्महत्या बोल्नेले कहिल्यै गर्दैन । तथ्यः मद्दत आवश्यक छ ।’, ‘मिथः आत्महत्या रोक्न सकिँदैन । तथ्यः रोकथाम सम्भव छ, सहयोग खोजौं ।’ लेखिएका प्लेकार्टसहित तिलोत्तमा नगरपालिकाको मंगलापुर, पुरानो सडक हुदै योगीकुटी आएर समापन गरिएको थियो । नेपाल मनोचिकित्क संघका महासचिव डा मनोज ढुगानाले गतवर्षदेखी साईक्लिङसंग जोडेर आत्महत्या रोकथाम दिवसलाई सचेतनामुलक कार्यक्रम अघि बढाएको बताए ।

कार्यक्रममा नेपाल मनोचिकित्सक संघका उपाध्यक्ष डा सन्दिप सुवेदीले हाम्रो समाजमा आत्महत्याबारेमा सामाजिक गलत धारणा, अन्धविश्वास तथा लोकलाज विद्यमान रहेको बताए । आत्महत्या सम्बन्धी समस्या भएका व्यक्ति वा परिवारका सदस्यले सहयोग पाउनुका बदला भेदभाव, अपहेलना र लान्छना व्यहोर्नुपरेको घटनाहरु धेरै रहेको उनले बताए । आत्महत्या रोकथाम दिवसको रुपमा सरोकारवाला निकायहरु समुदायमा पुग्न जरुरी रहेको उनले बताए । विद्यालयबाट मानसिक स्वस्थ्य र आत्महत्या रोकथाम सचेतना अघि बढाउने गरि सरकारबाट नै अभियान शुरु भैसकेको उनले बताए ।

कार्यक्रममा रुपन्देही लनटेनिस संघका अध्यक्ष गोपाल ज्ञवाली, बुटवल युनाईटेड साईक्लिङ क्लबका अध्यक्ष उत्तम श्रेष्ठले खेलकुद र स्वास्थ्यलाई जोडेर कार्यक्रमहरु अघि बढाउनुपर्ने बताए ।