सामग्री खोज्नुहोस्

लमही, १९ भदौ ।

चाडबाडमा हुने भिडभाडलाई लक्षित गरी दाङको लमही बजारका सडकहरुमा जेब्रा क्रसिङ निर्माण गरिएको छ ।

लमही चेम्बर अफ कमर्सको आयोजनामा लमही बजारका भित्रि सडक र हाईबेमा समेत जेब्रा क्रसिङ बनाइएको हो । बजारका सडकहरुमा भएका जेब्रा क्रसिङ पुरानो भएकाले पैदल यात्रीहरु अन्यौलमा पर्ने र जसले गर्दा दुर्घटना निम्तिन सक्ने भन्दै क्रसिङ सिंगनललाई पुनः कलर गरिएको हो । दुर्घटना न्युनीकरणका लागि लमही चेम्बर अफ कमर्सको आयोजना, वडा प्रहरी कार्यालय लमही, ट्राफिक प्रहरी लमही, ५ नम्बर वडा कार्यालय र सक्रिय युवा ब्यसायीहरुको सहकार्य र संयोजनमा जेब्रा क्रसिङ कलर गरिएको हो ।

चाडबाड नजिकिदै गर्दा भिडभाड बढ्ने र क्रसिङ गर्दा पैदल यात्री अन्यौलमा परेर दुर्घटना हुने अवस्थालाई मध्यनजर गरी जेब्रा क्रसिङ पुनः कलर गरिएको लमही चेम्बर अफ कमर्सका अध्यक्ष शितल भुसालले बताए । उनले चाडबाडको बेला कसैमा पनि अप्रिय घटना नघट्नका निमित्त जेब्रा क्रसिङबाट बाटो क्रस गर्नुपर्ने सुझाए । साथै अध्यक्ष भुसालले चाडबाडको बेला चोरीका घटना बढ्ने भएकाले सबै ब्यवसायीहरुलाई सचेत हुन समेत आग्रह गरेका छन् ।

लमहीका सक्रिय ब्यवसायी तथा समाजसेवी डिल्लिराज खनालले जेब्रा क्रसिङ निर्माण सह्रानीय रहेको र यो अभियानमा आफू लगायत आफ्नो टिम पनि सहकार्यमा जुटेको बताए । “यो काम समाजको हितको निम्ति छ, यस्तो कामलाई सबैले समर्थन गर्दै साथ दिनुपर्छ समाजसेवी खनालले भने–“हामी चेम्बर अफ कमर्ससँगै अभियानमा जुटेका छौँ ।”

जेब्रा क्रसिङ निर्माणको कार्य केहीदिन सम्म निरन्तर चल्नेछ । बजार खेल्न आउनेहरु जेब्रा क्रसिङ मार्फत सडक पार गर्नुपर्ने भन्दै ट्राफिक प्रहरी कार्यालय लमहीले सबैमा अपिल गरेको छ । सडक सुरक्षा जीवनको रक्षा भएकाले सबैले सडक पार गर्दा जेब्रा क्रसिङ मार्फत पार गर्नुपर्ने ट्राफिक प्रहरी लमहीका प्रमुख प्रहरी सहायक निरीक्षक टेक बहादुर कुसारीले बताए । जेब्रा क्रसिङ नहुँदा पैदल यात्री लापरबाही तरिकाले सडकमा हिड्ने र जसले गर्दा ४० प्रतिशत बढी दुर्घटना जेब्रा क्रसिङको अभावले हुने गरेको पाइएको प्रमुख कुसारीले बताए ।

हुइँकिएर आएका गाडीलाई पनि कहाँ स्पिड कम गर्ने भनेर अलमल हुने र यसले दुर्घटना निम्तिने सम्भावना बढ्ने बताए । “जेब्रा क्रसिङ भएको बाटोमा हिँड्दा केही हदसम्म सुरक्षित महसुस हुन्छ, लमही बजार भित्रका जेब्रा क्रसिङ चाँडै मेटिने भएकाले बढीमा तीन महिनाभित्रै रङ लगाउनु पर्ने हुन्छ”– प्रमुख कुसारीले भने–“अस्पताल, विद्यालय, पसल र धेरै मान्छे ओहोरदोहोर हुने ठाउँमा पर्याप्त जेब्रा क्रसिङ हुनुपर्छ ।”

जेब्रा क्रसिङले विद्यालय क्षेत्र, मुख्य चोकहरुमा पैदल यात्रुलाई सहज हुनुका साथै सवारी गति नियन्त्रण गर्न सघाउनेछ