खोज

बुटवल, १७ भदौ । देवदहका घरायसी कामकाजमा ब्यस्त रहने गृहणी महिलाहरुलाई स्वरोजगार बनाउने गरि ३ महिने निशुल्क सिलाइकटाइ तालिम शुरु भएको छ । रोटरी क्लब अफ बुटवल डाउनटाउनको आयोजनामा देवदह नगरपालिकास्थित श्री चेली कृषि सहकारी सस्थाको सहयोगमा सोमबारदेखी तालिमको सुभारम्भ गरिएको हो ।

कार्यक्रमको देवदह नगरपालिकाका उपप्रमुख विद्यालक्ष्मी गुरुङ, रोटरी क्लब अफ बुटवल डाउनटाउनका अध्यक्ष शिव ज्ञवालीले तालिमको शुभारम्भ गर्दै सिकेको सिपलाई ब्यवहारमा लागू गर्न सुझाव दिए ।

क्लबका अध्यक्ष शिव ज्ञवालीले आर्थिक रुपमा महिलाहरु सबल नभई समाजमा समानता नआउने भन्दै उनले स्थानिय सरकारबाट महिला स्वावलम्बन, जागरणका योजनालाई प्राथमिकता दिनुपर्ने बताए । महिला सशक्तिकरणको महत्वपूर्ण पाटो सीप र स्वरोजगार भएको भन्दै ग्रामिण क्षेत्रमा महिलालाई सीप सिकाउदै आर्थिक रुपमा सबल बनाउने गरि वार्षिक रुपमा महिला स्वरोजगारमुलक सीप तालिमलाई निरन्तरता दिएको उनले बताए । प्रत्येक वर्ष तालिम संचालन गर्न आर्थिक सहयोगका साथै आवश्यकता अनुसार सिलाई मेशिन समेत सहयोग गर्दै आएको उनले बताए ।

कार्यक्रममा श्री चेली सहकारी संस्थाका अध्यक्ष सावित्रा बश्यालले विगत पाच वर्षदेखि क्लबको सहकार्यमा निरन्तर तालिम चलाउदै महिलाहरुलाई सीप सिकाउन सफल भएको बताईन । घरायसी काममा ब्यस्त रहने गृहिणीहरु पछिल्लोसमयमा सीप सिकेर ब्यवसाय गर्नेको कमी नरहेको उनले बताईन । तालिमसंगै महिलाहरुलाई सिलाई मेशिनको आवश्यकता रहेको भन्दै उनले धेरैजना समुहमा रहेर ब्यवसाय गर्न ईच्छुक देखिएको बताईन ।

कार्यक्रममा क्लबका संयोजक तेज कुमारी लुईटेलले पाच वर्षको अवधिमा करिब ७ सय जना महिलाहरुले सिप सिकाउन क्लबबाट सहयोग भएको बताईन । सीप सिकेर करीब एक सय बढीले उद्यमीका रुपमा स्वरोजगार बन्न सफल भएको समेत बताईन ।

कार्यक्रममा क्लबका पूर्वअध्यक्ष नर बहादुर श्रीष, जीवन अधिकारी, सचिव कमल नेपाल, चेली सहकारीका उपाध्यक्ष देवि अधिकारीले रोटरीको लक्ष्य अनुसार क्लबबाट यस क्षेत्रमा नै महिला सशक्तिकरणमा महत्वपूर्ण काम गर्न सफल भएको बताए ।