खोज

बुटवल, १७ भदौ ।

स्याङ्जा गल्याङ नगरपालिकाका रुपन्देही सम्पर्क समाजले अक्षयकोष स्थापना गर्ने उद्देश्यले तिज मिलन कार्यक्रम सम्पन गरेको छ ।

गल्याङ नगरपालिकाबाट अध्ययन, अध्यापन, रोजगारी तथा बसाईसराई गरेर रुपन्देही आएका सम्पुर्ण स्याङ्जा गल्याङ नगरपालिकाबासीहरुको हक हितमा काम गर्ने उद्देश्यले अक्षयकोष निर्माण गर्न लागिएको संस्थाका अध्यक्ष जनक कुमार श्रेष्ठले बताए । तिज मिलन कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेयले सम्पर्क समाजले जन्मथलो र कर्मथलोलाई जोडने पुलको काम गर्ने बताए ।

धेरै स्याङजालीको बसाई रहेपनि रुपन्देही जिल्लामा सम्पर्क समाज नहँुदा एकतावद्ध हुन नसकेको भन्दै आउँदा दिनहरुमा सम्पर्क समाजले जन्मथलोमा हुने विकास र कर्मथलोमा हुने सुखदुखमा समाजको भूमिका महत्वपूर्ण हुने प्रमुख पाण्डेयको भनाई छ । गल्याङ नगरपालिकाका नगरप्रमुख गुरु प्रसाद भट्टराईले रुपन्देहीमा रहनुहुने स्याङजा गल्याङ रुपन्देही समाजले समाजमा असल कर्म गरेर उदाहरणीय हुनुपर्ने बताए ।

नगरपालिकामा भएको स्रोतको पहिचान र गर्दै विकास निर्माणमा सबैको सहयोग जरुरी रहेको प्रमुख भट्टराईको भनाई छ । शैक्षिक, भौतिक, राजनीतिक चेतना जगाउँदै गल्याङ नगरको विकास गर्नुपर्ने अवस्था रहेको भन्दै युवाहरु वैदेशिक रोजगारीमा जाने बसाई सराईका कारण हिजोका हराभरा खेतबारी बाँझो भएका छन् ।

उपाध्यक्ष हेमा न्यौपाने तिमिल्सेनाले गल्याङ नगरपालिकाले तराई र पहाडलाई जोड्ने गरी विकास निर्माणका कार्यक्रमहरु सन्चालन गर्ने बताईन् ।

गाउँमै युवाहरुलाई स्वरोजगार गराउने गरी कामहरु सन्चालन गर्ने भन्दै उपाध्यक्ष न्यौपानेले गल्याङ रुपन्देही दुरीको हिसाबले टाढा नभएकाले तराईमा सिकेका सिपहरु कृषिकर्महरु जन्मभुमिमा समेत सन्चालन गरेर गाउँलाई आर्थिक रुपमा समृद्ध गराउन सबैको सहयोग आवश्यक रहेको बताइन् । गरिमा विकास बैंकका सञ्चालक समितिका अध्यक्ष श्याम प्रसाद बस्यालले सम्पर्क समाज गठनले रुपन्देहीमा उत्साह देखीएको बताए । संस्थाका बरिष्ठ उपाध्यक्ष एसपी खड्काले अक्षयकोष निर्माण तथा तिज कार्यक्रमले सबैलाई एक हुन सहयोग पुगेको बताए । कार्यक्रममा पिताम्बर अर्याल अमृता भण्डारी न्यौपाने लगायतले बोलेका थिए ।