खोज

बुटवल, १२ भदौ । रुपन्देहीको तिलोत्तमा–३ जानकीनगरमा रहेको दुई तले घरमा देखिएको विवाद समाधान गरि घरमा बस्ने वतावरण बनाई दिन घरधनी पशुपति घिमिरेले सबैसँग आग्रह गरेका छन । श्रीमति राधादेवी पौडेलको नाममा २०७४ सालमा खरिद गरेको घर पहिलेका घरधनीले छाड्न नमानेको भन्दै घिमिरेले घरमा बस्ने अनुकुल वातावरण मिलाई दिन गुहार गरेका हुन ।

बुधबार पत्रकार सम्मेलन गरेर आफुले खरिद गरेको घरमा बस्ने अनुकुल वातावरण सृजना गर्न पुराना घरधनीसँगै प्रहरी प्रशासन, नगर, वडा कार्यालय सबैसँग आग्रह गर्दै उनले तिलोत्तमा ३ (साविकको आनन्दवन गाविस–३ ‘ख’) स्थित कित्ता नम्बर ३८६९ मा रहेको १६.७५ क्षेत्रफलको जग्गामा बनेको २ तले घर घिमिरे (श्रीमति राधादेवी पौडेल) ले ७४ सालमा बिमलाकुमारी श्रेष्ठसँग खरिद गरेको दाबी गरे । आफुले खरिद गरेको घर आफैलाई दिनुपर्ने माग समेत पत्रकार सम्मेलनमा उनले गरे । सबै प्रकृयासहित सहमतिमै घर जग्गा खरिद गरेको उल्लेख गर्दै आफुमाथी लगाइएका विभिन्न आरोपहरु निराधार रहेको उनले प्रतिकृया दिए । आफुलाई बिमलासँग २० करोड रुपैया माग गरेको आरोपमा कुनै सत्यता नभएको घिमिरेले बताए । कुमारी बैंकमा घर धितो राखेको र कुमारी बैंकले करिव एक महिना अगाडि घर लिलामको ३५ दिने सुचना समेत टाँस गरेको उनले बताए । “अहिले पनि २ करोड ७० लाख जति बैंकमा लोन तिर्न बाँकी छ ।”  -उनले भने । आफुले किनेको घर आफ्नै भएकाले भदौ १५ गते घर सर्ने कार्यक्रम रहेको समेत घिमिरले पत्रकार सम्मेलनमा जानकारी दिए ।

यस्तै यसअघि नै विमला कुमारी श्रेष्ठले संचारकर्मीलाई प्रतिकृया दिदै लेनदेनअघि आफूहरु बीच भएको सहमति अनुसार नै घरजग्गा आफुले फिर्ता पाउनुपर्ने माग गरेकी थिइन । कागजातमा जे जस्तो भएता पनि घर फिर्ता गर्न लाग्ने र हिसाबमा देखिए अनुसारको रकम घिमिरेलाई बुझाउन आफु तयार रहेको श्रेष्ठले प्रतिकृया दिईन । २०७४ सालमा घिमिरेले घर खरिद गरि आफ्नो नाममा बनाएतापनि विगत ७ वर्षदेखि श्रेष्ठ परिवार सोही घरमा बस्दै आएका छन् ।