खोज

प्युठान, १२ भदौ ।
चकचके–खलङ्गा सडक खण्डमा पर्ने क्वाडी–बाग्दुला सडक फराकिलो गरिने भएको छ । सडक डिभिजन कार्यालय प्युठानले टेण्डर आव्हान र प्युठान नगरपालिकाले संरचना हटाउन शुरु गरेसँगै सडक फराकिलो बनाउने प्रक्रिया शुरु भएको हो ।
सडक फराकिलो बनाउनेका कार्यका लागि नगरपालिकाले सडक अतिक्रमण गरी बनाइएका संरचना हटाउन आव्हान गरेको प्युठान नगरपालिकाका निमित्त प्रमुख प्रशासकीय अधिकृत गोविन्द घिमिरेले जानकारी दिए । ‘सडक क्षेत्रमा आवास हटाउन सूचना निकालेका छौं’ घिमिरेले भने,‘त्यसतो क्षेत्रमा बनेका संरचना नगरपालिकाले हटाउँदछ ।’ सडक निर्माणका लागि सबै नागरिकले दायित्व बोध गर्नु पर्ने घिमिरेको भनाइ छ ।

सडक डिभिजन कार्यालय प्युठानले क्वाडि–बिजुवार–बाग्दुला सडक बिस्तारको केही दिन अघि टेन्डर खुलाएको थियो । प्युठान नगरपालिका १ क्वाडी स्थित बेलुवा खोलादेखि प्युठान नगरपालिका ८ बाग्दुलासम्म कालोपत्रे सडक यस आर्थिक वर्षमा ५ सय मिटर सडक बिस्तार गर्ने गरीने सडक सडक डिभिजन कार्यालय प्युठानका प्रमुख राजीव श्रेष्ठले बताए । जस अन्तर्गत दायाँबायाँ गरी १५ मिटरको चौडा बनाउने, पर्खाल उठाउने, नाली बनाउने, ग्राभेल सहित कालोपत्रेको काम गरिनेछ । नेपाल सरकारको वैकल्पिक सहायक राजमार्ग शीर्षक अन्तर्गत विनियोजित १ करोड बजेटमा उक्त काम गर्ने सडक डिभिजन कार्यालय प्युठानले जनाएको छ ।

सडक विस्तार गर्दा सडक वरिपरि रहेका घर टहराहरू हटाउनुपर्ने भएकोले स्थानीय समुदाय, स्थानीय प्रशासन र प्युठान नगरपालिकासँग समन्वय गरिएको छ । सडक साँघुरो खाल्डाखुल्डी भएकाले यात्रामा असहज भएको अवस्थामा सडक चौडा र कालोपत्रे गर्ने योजना छ । यसपछि यात्रामा थप सहज हुने आशा गरिएको छ । सडक विस्तारको कामले बर्सेनि भइरहने दुर्घटनालाई समेत कम गर्नमा सहयोग पुग्ने सडक डिभिजन कार्यालयले विश्वास लिएको छ ।

क्वाडी– बिजुवार– बाग्दुला सडक विस्तार गर्ने काम सडक डिभिजन कार्यालयले गर्न थालेको बताउँदै प्युठान नगरपालिकाले सहजीकरण गर्ने प्युठान नगरपालिकाका नगरप्रमुख विष्णु बहादुर योगीले बताए । ‘सडक विस्तार गर्ने सबैको साझा धारणा छ’, मेयर योगीले भने,‘त्यसले गर्दा बाटोलाई अवरोध नहुने गरी स्थानीयसँग सहमति गरेर अघि बढ्छौ ।’ बेलुवा क्वाडी हुँदै बाग्दुलासम्मको बाटोमा धेरै चाँप, साँघुरो बाटो भएका कारण असुरक्षा भएको भन्दै सबैको एउटै निष्कर्ष भनेको बाटो रहेको योगीको भनाइ छ ।