खोज

बुटवल, ९ भदौ । मदन भण्डारी स्पोर्टस एकेडेमी रुपन्देही जिल्ला कमिटिको छैटौ अधिवेसनबाट सुनिल कुमार कुवँरको अध्यक्षतामा ५१ सदस्यीय जिल्ला कमिटि निर्विरोध निर्वाचित भएका छन । बुटवलमा शुक्रबार सम्पन्न अधिवेसनबाट एकेडेमीको उपाध्यक्षमा उत्तम श्रेष्ठ, सचिव राजु पौडेल, कोषाध्यक्ष मेख बहादुर पुन, सहसचिव देव बहादुर थापा घर्ती निर्वाचित भएका हुन ।

एकेडेमीका संस्थापक अध्यक्ष ज्ञानदेव हटुवाल रहेका थिए । त्यसपछि लगातार ध्रुव आचार्य, नन्दु काउचा, कृष्ण देवकोटा, मणिरत्न भण्डारी हुदै सुनिल कुमार कुवँर छैटौ अध्यक्षको जिम्मेवारी पाए । कार्यक्रममा नवनिर्वाचित अध्यक्ष सुनिल कुमार कुवँरले आफनो कार्यकालमा गर्ने कार्यक्रमबारे प्रकाश पार्दै यसमा सबैको साथ र सहयोग जरुरी रहने बताए । एकेडेमीको गरिमा अझ उचो बनाउने गरि खेल गतिविधिमा जोड दिने उनले प्रतिवद्धता जनाए ।

कार्यक्रमको उद्घाटन गर्दै एकेडेमीका केन्द्रिय अध्यक्ष ध्रुव आचार्यले रुपन्देहीको नेतृत्व केन्द्रसम्म महत्व राख्ने हुदा पनि समावेशी कमिटि निमार्ण गरिएको बताए । खेल र खेलाडीको भावना बुझेको टिममा बस्दा विकासमा टेवा पुग्ने हुदा पनि यसमा जोड दिईएको उनले बताए ।
कार्यक्रममा एकेडेमीका केन्द्रिय सचिव डा शक्ति बस्नेत, क्रिकेट विभाग प्रमुख शक्ति गौचन लगायतले शुभकामना दिएका थिए ।

कार्यक्रममा निर्वतमान अध्यक्ष मणिरत्न भण्डारीले खेलाडीलाई प्लेटफर्म दिने गरि वर्षभरि नै धेरै कार्यक्रम गर्न सफल भएको दाबी गरे । खेलकुद विकासको लागि खेलाडी तथा प्रशिक्षक सम्मान, प्लस टु छात्रछात्रा भलिबल तथा बुद्धिचाल प्रतियोगिता, यु—१४ लिटल स्टार क्रिकेट प्रतियोगिता, खेलाडी सम्मान तथा संरक्षण कार्यक्रमहरु गर्न सफल भएको भण्डारीले बताए । यसैबिच एकेडेमीलाई विभिन्न कार्यक्रम गर्न सहयोग गर्ने सहयोगदाता, खेलाडीहरुलाई अधिवेसनमा सम्मान गरिएको थियो ।