खोज

बुटवल, ९ भदौ ।

गैरीखुट्टा सेवा समाजले हिन्दु नारीहरुको महान पर्व हरितालिका तीजको अवसरमा तीज मिलन कार्यक्रम सम्पन्न गरेको छ । गैरीखुट्टाबाट रुपन्देहीका विभिन्न ठाउंमा स्थायी तथा अस्थायी बसोवास गर्ने सबै गैरिखुट्टाबासीहरुको उपस्थितिमा कार्यक्रम सम्पन्न भएको समाजका सचिब बद्री घिमिरेले जानकारी दिए ।

तीजको अवसरमा रूपन्देहीको तिलोतमा नगरपालिकास्थित शंकरनगर वनबाटीका मा शनिबार आयोजित तिजमिलन तथा सम्मान कार्यक्रममा चेलिबेटी हरुलाई तिजको शुभकामना दिदैं दर खुवाइ आर्थिक सहयोग गर्ने दाताहरूलाई सम्मानपत्र सहित दोसल्ला ओडाएर सम्मान गरेको थियो ।

कार्यक्रमको उदघाटन समाजका सल्लाहकार ज्ञान प्रसाद घिमिरेले गरेका थिए । त्यस अवसरमा उनले मानिस जो जहां रहेपनि जन्म भूमिको सम्झना र माया सदा रहिरहने बताए । जन्म भूमि प्रतिको माया ममता र भाइचाराको सम्बन्ध कहिल्यै बिर्सन नहुने उनले गैरिखुट्टाबासीहरुलाई आग्रह गरे ।

यसै समाजका आजिवन सदस्य राममणि अर्यालले गैरीखुट्टा सेवा समाज खोलिनुको उद्देश्य र यसका काम कर्तव्य बारे प्रष्ट पारेका थिए भने तीज मिलन कार्यक्रमका संयोजक समाजका सदस्य केदार घिमिरेले यो समाज विशुद्ध सामाजिक उद्देश्यले स्थापना गरिएकाले सबै गैरिखुट्टाबासी यस समाजमा आवद्ध भएर सामाजिक अभियानमा जुट्न आग्रह गर्दै साथ सहयोग गर्ने सम्पूर्णलाई धन्यवाद दिए ।

सो अवसरमा रमाईलो नाच गान सहित एक आपसमा शुभकामना आदान प्रदान गरिएको समाजका अध्यक्ष टिकाराम गौतमले जानकारी दिए ।