खोज

बुटवल, ८ भदौ ।

राष्ट्रिय योजना आयोगका सदस्य प्रकाश कुमार श्रेष्ठले व्यवसायीहरुले अव व्यापारको ट्रेन बदल्नुपर्ने बेला आएको बताएका छन् ।

उनले अवको व्यापार परम्परागत ढंगबाट चल्न नसक्ने भन्दै व्यापारको ट्रेन नबदल्ने हो भने अझै धेरै सटरहरु बन्द हुने बताए ।

नेपाल चेम्बर अफ कमर्स लुम्बिनी प्रदेशको अधिवेशनमा विशेष वक्ताको रुपमा निम्त्याइएका श्रेष्ठले उपभोक्ताहरुको रोजाई सुपरमार्केट र अनलाईन व्यापारतर्फ रहेकाले अव व्यवसायीहरु क्रमशः यस दिशातर्फ केन्द्रित हुनुपर्ने बताए । “थुप्रै व्यवसायीहरुले व्यवसायच लेन मन्दी आयो भन्नुहुन्छ, तर भाटभटेनी जस्ता सुपर मार्केट हेर्ने हो भने मन्दी आएको देृखिंदेन, व्यापार बढेको छ, बरु अव उपभोक्ता स साना सटर छाडेर सुपर मार्केटतर्फ केन्द्रित हुन थालेका छन् ।”

लुम्बिनी प्रदेश योजना आयोगका पुर्व उपाध्यक्ष समेत रहेका श्रेष्ठले विश्व अर्थतन्त्रमा आएको परिवर्तनले नेपाली अर्थतन्त्रलाई पनि डोर्याएको तर त्यस अनुरुप नेपाली व्यवसायीहरु हिंड्न नसकेको बताए । “अहिले प्रविधिलाई प्रयोग गर्दै व्यापार गर्नुपर्ने स्थिति आएको छ, अनलाईन व्यापापार फस्टाउन थालेको छ, किनकी अहिलेको युवा पीढि त्यसतर्फ आकर्षित छ”–उनले भने, “तर नेपाली व्यवसायीहरुको व्यापार गर्ने तौर तरिका भने पुरानै ढर्राको र परम्परागत छ ।”

उनले पहिलेको जेनरेशनले आधुनिक व्यापारलाई अंगाल्न नसकेको र नयाँ जेनरेशन आफ्ना पुस्ताले गर्दै आएको व्यवसायमा रुची नराखेर विदेश पलायन भैरहेको भन्दै यो पनि मुख्य समस्याको रुपमा रहेको बताए । श्रेष्ठले मुलुकको आर्थिक अवस्थामा परिवर्तन हुँदै नभएको जसरी भाष्य खडा गर्न खोजिएको भन्दै त्यो पनि सत्य नभएको बताए । “हिजो साइकल चढ्नेहरु आज गाडीमा हिंड्न सक्ने भएका छन्, यो आर्थिक अवस्थामा आएको परिवर्तन हो”–श्रेष्ठले भने, “तर परिवर्तनलाई आत्मसाथ नगरी असन्तोष मात्रै गर्ने प्रवृत्तिले भने नकारात्मक मनोविज्ञानको विकास गरेको छ ।”

उनले लुम्बिनी प्रदेशको आर्थिक अवस्था सुधार्न तीनवटा क्षेत्रलाई केन्द्रित गरेर विकास गर्नुपर्ने आवश्यकता औंल्याए । कृषि, उद्योग र पर्यटनमा यो प्रदेशमा थुप्रै संभावना रहेकाले प्रदेश सरकार यस दिशातर्फ केन्द्रित हुनुपर्ने सुझाव दिए ।