खोज

रोल्पा, ०७ भदौ ।
स्थानीय व्यवसायीहरूको वन्दका कारण रोल्पा सदरमुकाम लिवाङ ठप्प भएको छ । विहिवार विहानै देखी पसल, होटल, चिया पसल, उद्योग, डेरी उद्योग , तकारी, औषधी पसल सबै वन्द भएका छन । व्यवसाय बन्द गरेर उनीहरू रोल्पा नगरपालिकाले लिँदै आएको करको विरोधमा उत्रिएका हुन ।
उनीहरूले रोल्पा नगरपालिकाले निर्धारण गरेको व्यवसायी कर अवैज्ञानिक, अव्यवारिक र गैर कानूनी भएको आरोप लगाएका छन् । संघीय सरकार र प्रदेश सरकारले ९५ प्रतिशत सम्म कर छुट गराएर व्यवसायीहरूलाई करको सहुलियत दिएपनि रोल्पा नगरपालिकाको स्थानीय सरकारले ६ सय प्रतिशत सम्म कर बढाएको उनीहरूका आरोप छ ।

पछिल्लो पटक निर्धारण गरिएको व्यवसायी कर अवैज्ञानिक, अव्यवहारिक र गैरकानूनी भएकाले आफूहरू विरोधमा उत्रिएको रोल्पा उद्योग वाणिज्य संघका अध्यक्ष केशवकुमार आचार्यको भनाइ छ । स्थानीय सरकार व्यवसायीको पनि अभिभावक हुनुपर्नेमा सौतेनी व्यवहार गरेको अध्यक्ष आचार्यको आरोप छ ।

रोल्पा उद्योग वाणिज्य संघले यस विषयमा चरणवद्ध कार्यक्रम समेत गरिरहेको छ । उसले गत असार १८ गते रोल्पा नगरपालिकाका नगरप्रमुख सुरेन्द्र थापा घर्तीसँग छलफल गरेको थियो । पहिलो छलफलमा सकारात्मक छलफल भई दोश्रो छलफल असार २५ गते गर्ने सहमती भएपनि सो मितिमा आफूहरूलाई नगरपालिकाले छलफलका लागि खबर नगरेको रोल्पा उद्योग वाणिज्य संघले बताएको छ । साउन ७ गते रोल्पा उद्योग वाणिज्य संघको बैठकले जनविरोधी करको विरुद्ध थप दबाब दिने निर्णय गरेको थियो । सोही अनुसार संघर्ष तथा परामर्श समिति गठन गरि दबाबमुलक कार्यक्रम समेत तय गरेको थियो । उसले गत साउन २२ गते रोल्पा नगरपालिकाका नगर प्रमुख सुरेन्द्र थापा घर्तीमगरलाई भेटी पुनः ध्यानाकर्षण गराएको थियो । यसैगरी जिल्ला प्रशासन कार्यालय रोल्पामा ज्ञापन पत्र बुझाउने देखि जिल्लास्थित राजनैतिक दल र संचारकर्मीहरूसंग समेत यस विषयमा परामर्श गरेको रोल्पा उद्योग वाणिज्य संघका अध्यक्ष केशवकुमार आचार्यको भनाइ छ ।

रोल्पा नरपालिकाले लिँदै आएको करको विवाद समाधान नभएसम्म व्यवसायीहरूले कर नतिर्ने घोषणा गरेका छन् । जिल्ला सदरमुकाम लिवाङमा वसेको उद्योगी व्यवसायीहरूको वृहत भेलाले विवाद समाधान नभएसम्मका लागी कर नतिर्ने घोषणा गरेको हो । उनीहरूले नगरपालिकाको कार्यालयलाई कुनै सामान चिटका आधारमा बिक्री नगर्ने र उपलब्ध नगराउने निर्णय समेत गरेका छन् ।

रोल्पा नगरपालिकाबाट लिइएको अव्यवहारिक, असामान्य, असान्दर्भिक, आपत्तिजनक र अवैज्ञानिक स्थानीय व्यवसायिक करको विरुद्धमा संघर्ष र परामर्श समिति समेत गठन गरिएको छ । सो समितिले साउन २८ गते जिल्ला प्रशासन कार्यालय रोल्पामा ज्ञापन पत्र समेत बुझाएको छ । ४ बँुदे ज्ञापन पत्रमा रोल्पा नगरपालिकाले लिँदै आएको कर प्रणालीको विरोध गरिएको छ । साना व्यवसायीहरूको ढाड सेक्ने गरि अवैज्ञानिक र गैरकानूनी तवरले लिईदै आएको कर अबिलम्व सच्याउन आग्रह गरिएको रोल्पा उद्योग वाणिज्य संघका अध्यक्ष केशव आचार्यले जानकारी दिए । पहिलो चरणमा परामर्श छलफल, माग पत्र पेश जस्ता कार्यक्रम गर्यौ । त्यसलाई सुनुवाई नभएपछि दोश्रो चरणमा शान्तिपूर्ण रूपमा अनिश्चित कालिन व्यवसाय वन्द गरेर विरोधमा उत्रिएका छौ अध्यक्ष आचार्यले भने । हाम्रो आग्रहको सुनुवाई नभए थप कडा संघर्षका कार्यक्रम अघि बढाउँछौ अध्यक्ष आचार्यले भने ।
दश स्थानीय तह रहेको रोल्पामा तीन स्थानीयले व्यवसायी कर लिइरहेका छन । व्यवसायी कर लिने स्थानीय तहहरूमा सुनिलस्मृती गाउँपालिका, माडी गाउँपालिका र रोल्पा नगरपालिका रहेका छन । जिल्लाका अन्य वाँकी ७ स्थानीय तहहरूले भने अहिले सम्म व्यवसायी कर लिएका छैनन । कर लिएका तीन मध्ये सुनिलस्मृती गाउँपालिका र माडी गाउँपालिकाले स्थानीय व्यवसायी संग परामर्श गरी कर लिएको रोल्पा उद्योग वाणिज्य संघले जानकारी दिएको छ ।