खोज

बुटवल, ४ भदौ ।

काँग्रेसका फरार सांसद धनबहादुर केसी उर्फ डिबी लुम्बिनी प्रदेशका मुख्यमन्त्री चेतनारायण आचार्यलाई विश्वासको मत दिन मंगलबार प्रदेश सभामा बैठकमा सहभागी भएका छन् । गत साउन ७ गते नेपाली कांग्रेसको समर्थनमा नेकपा (एमाले) का नेता आचार्य मुख्यमन्त्री नियुक्त भएका थिए ।

विश्वासको मत दिन उनै फरार अभियुक्त रुकुम पूर्वका कांग्रेसका सांसद धनबहादुर केसी उर्फ डिबी प्रदेश सभा बैठकमा सहभागी भएपछि विपक्षी दल माओवादी केन्द्रले सदनबाटै बिरोध गरेको थियो । प्रदेश सासंद केसी सम्बन्ध विच्छेदको नक्कली कागज बनाएपछि उनकै श्रीमती राधा केसीको जाहेरीमा (वादी नेपाल सरकार) सुनुवाइ गर्दै अदालतले केसीलाई दोषी ठहर गरेको हो । आदालतले उनलाई १ बर्ष जेल सजाय र २ हजार रुपैयाँ जरिवाना समेत तोकिसकेको छ ।

२०४८ साल असार ९ गते अदालतले दोषी ठहर गरी फैसला सुनाए पनि केसी प्रहरीकै संरक्षणमा हिडेका छन् । हालसम्म उनले सजाय भुक्तान गरेका छैनन् । नेपाली काँग्रेसका तर्फबाट उम्मेदवार बनेर उनी रुकुम पूर्वको प्रदेश (ख) बाट सांसद निर्वाचित भए । ‘अदालतबाट दोषी प्रमाणित भएका व्यक्ति सदनमा छन, जेलमा बस्नुपर्ने मान्छे सदनमा बस्नु कानुनी राज्यको उपहास हो’ प्रतिपक्ष माओवादी केन्द्रको आरोप छ ।

फरार अभियुक्त केसीले सरकारलाई बिश्वासको मत दिए पश्चात टिलिक्क टल्कने कालो गाडीमा पत्रकारको क्यामेराबाट पन्छिन खोज्दै सदनबाट चोर बाटो निस्किए र कुदे । उनले बा १ झ ७२४४ नं. को सरकारी गाडी प्रयोग गरी हातले मुख छोप्ने प्रयास गर्दै प्रदेश सभाबाट बाहिरिए । आरएआईडिपी कार्यालयको सेतो नम्बर पेलेटको गाडी सरकारकै संरक्षणमा प्रयोग गरिरहेका छन् ।

तर यता लुम्बिनी प्रदेश प्रहरी कार्यालयका प्रमुख कुबेर सिंह कठायतले भने उनको बिषयमा थाहा पाएको तर मुद्दाका बिषयमा सबै फाईल हेर्न बाँकी रहेको बताए । उनले फरार अभियुक्त सांसद केसीलाई संरक्षण गर्दै अदालतले गरेको निर्णय पनि आफुले स्वीकार नगरी पुनः एकपटक फाईल हेरेर अध्ययन गरेर मात्रै अगाडि बढ्ने बुटवल टुडेलाई बताए । प्रहरी प्रमुख कठायतले भने पटक पटक प्रश्नको जवाफ नदिई फोन काटेर पन्छिन समेत कोशिस गरे ।

फरार सांसद केसी अहिले सम्म प्रदेश सभाको ३८ वटा बैठकमा उपस्थित छन् । उनै फरार सांसद मंगलबार लुम्बिनीका मुख्यमन्त्री चेतनारायण आचार्यलाई बिश्वासको मत दिन प्रदेश सभामा आउने सूचना थाहा पाएपछि बुटवल टुडेले जिल्ला प्रहरी कार्यालय रुकुम पुर्वका डिएसपी र प्रदेश प्रहरी प्रमुख कुवेर कठायतसँग कुरा गर्दै फरार सांसदको उपस्थिति बारे जानकारी मागेको थियो । पछि उनलाई प्रकाउ गर्न प्रहरी परिचालन गर्ने भने पनि प्रदेश प्रहरी कार्यालयले बेवास्ता र संरक्षण गरेकै कारण प्रहरीले पक्राउ गर्न चासो नदिएको हो । बिहान सूचना पाउँदा समेत ती साँसदलाई पक्राउ गर्न प्रहरी निरीह देखिएको छ ।

प्रहरीका एक उच्च अधिकारीले गृहमन्त्रीले नै सांसद केसीलाई पक्राउ नगर्न दबाब दिएको दाबी गरे । पक्राउ नगर्न गृहमन्त्रीको दबाब छ । उनले भने, “फरार मान्छे संसदमा देख्दा पनि हामी निरिह बन्न बाध्य भयौँ ।”