खोज

बुटवल, ५ कात्तिक ।

नेकपा एमालेका उपाध्यक्ष विष्णु पौडेलले सत्ता गठबन्धन संकटतर्फ धकेलिएको बताएका छन् । गठबन्धनभित्रको असन्तुष्टी र किचलोले उ आफै संकटमा धकेलिएको उनले बताए ।

रुपन्देही–तानसेन सम्पर्क मन्चले शनिबार बुटवलमा आयोजना गरेको शुभकामना आदानप्रदान तथा उम्मेदवार परिचयात्मक कार्यक्रममा बोल्दै पौडेलले एमालेले विकास बाहेक अरु कुरा सुन्नै नचाहने पनि बताए । “एमालेको एकमात्र उद्देश्य विकास र समृद्धि हो, तर सत्ता गठबन्धन एमालेको उछितो काढेर आफ्नो स्वार्थ सिद्ध गर्ने दिशामा अघि बढेको छ”–पौडेलले भने ।

उनले पाल्पासँग आफ्नो भावनात्मक सम्बन्ध गाँसिएको भन्दै पाल्पाको विकासका लागि आफूले सहयोगी भूमिका निर्वाह गर्ने पनि बताए । पौडेलले पाल्पा क्षेत्र नम्बर २ बाट उम्मेदवार बनेका ठाकुर गैरे आन्दोलनबाट स्थापित नेता भएको भन्दै उनलाई विजयी गराएमात्र आन्दोलनप्रति न्याय हुने बताए ।

कार्यक्रममा बोल्दै एमाले पोलिटब्यूरो सदस्य एवं पाल्पा क्षेत्र नम्बर २ का उम्मेदवार ठाकुर गैरेले तानसेनको विकासका लागि आफूले कहिल्यै व्यक्तिगत स्वार्थ नहेरेको बताए । पाल्पामा बिगतदेखिको एमालेको विरासत जोगाउन सबै कार्यकर्ता पंक्ति र जनता एकतावद्ध हुनु जरुरी रहेको पनि उनले बताए ।

कार्यक्रममा पाल्पा क्षेत्र नम्बर २ अन्तर्गत प्रदेश १ का एमाले उम्मेदवार फर्सुराम भट्टराई, प्रदेश २ का उम्मेदवार ओमबहादुर घर्ती, समानुपातिक उम्मेदवार इन्द्राकुमारी गहतराज, एमाले नेता धनेन्द्र घिमिरे, कुलप्रसाद नेपाललगायतले पनि मन्तव्य व्यक्त गरेका थिए ।