खोज

सल्यान, ६ साउन ।
सुत्केरी आमा र बच्चाको सबल स्वास्थ्यका लागि सल्यानको छत्रेश्वरी गाउँपालिकाले सुत्केरी आमाहरूलाई ‘उपाध्यक्षको पोषण कोसेली’ उपलब्ध गराएको छ । गाउँपालिकाको ७ वटै वडा स्थित स्वास्थ्य संस्थासम्म पुगेर ३५७ जना आमाहरूलाई पोषण कोसेली उपहार झोला वितरण गरेको गाउँपालिकाले जनाएको छ । ‘आमा र बच्चालाई स्वस्थ राख्न सकेमा मात्रै परिवार, समाज, समुदाय र सिंगो देशको विकास एवम् समृद्धिमा टेवा पुग्न सक्छ, यही मान्यतालाई आत्मसाथ गर्दै हामीले सुत्केरी हुनुभएका आमाहरूलाई पोषणयुक्त खाना र सरसफाई सामग्री सहितको झोला कोसेली स्वरूप वितरण गरेका हौँ’, छत्रेश्वरी गाउँपालिका उपाध्यक्ष बुद्ध कुमारी खत्रिले भनिन् ।

सुनौलो हजार दिनको अवधिमा पोषण तथा सरसफाइको महत्व बुझाउन, स्वास्थ्य संस्थामा सुत्केरी हुनका लागि प्रोत्साहन गर्न एवम वालवालिकाको बृद्धि विकासमा सहयोग पुर्याउनका लागि ‘उपाध्यक्षको पोषण कोसेली’ कार्यक्रम मार्फत आवश्यक सचेतनाका क्रियाकलापहरू सञ्चालन गरिएको हो ।
गत वर्ष पोषणयुक्त खानेकुरा उपहार स्वरूप पाएर पोषणको महत्व बुझेकी छत्रेश्वरी ५ सिरुवालीकी प्रकृति बुढाथोकीले अहिले आफ्नो बच्चालाई घरमै पोषिला खाद्य परिकार बनाएर खुवाउनेगरेको बताइन् । ‘मेरो छोरा २२ महिनाको भयो । मकै, गहुँ, भटमास लगाएतका अन्न र गेडागुडी भुटेर पिठो बनाई परिकार बनाएर खुवाउने गरेकी छु’, उनले भनिन्, ‘फलफुल, अण्डा, सागपात, जाउलो पनि नियमति रूपमा खुवाउने गरेका छौँ ।’ गाउँपालिकाले सञ्चालन गरेको कार्यक्रमले पोषणको महत्वबारे धेरै जानकारी पाएको भन्दै उनले घरमै ताजा तरकारी, फलफुल उत्पादन गर्नेगरेको र यसमा घरपरिवारका अन्य सदस्यहरूले पनि राम्रो साथ दिइरहेको प्रकृतिको भनाई छ ।

२०८० साउन देखि २०८१ असार सम्म सुत्केरी भएका आमाहरूलाइ पोषण कोसेली वितरण गरिएको गाउँपालिकाको स्वास्थ्य शाखाले जनाएको छ । वडा नं. १ स्थित दमाचौर स्वास्थ्य चौकीबाट ३७ जना, वडा नं. २ को दहखोला आधारभुत स्वास्थ्य सेवा केन्द्रबाट ५१ जना, वडा नं ३ स्थित आधारभुत स्वास्थ्य सेवा केन्द्र दोहलीबाट ४७ जना सुत्केरी आमाहरूलाई पोषण झोला वितरण गरिएको स्वास्थ्य शाखा प्रमुख केशरीदेवी भट्टराईले जानकारी दिइन् । यस्तै वडा नं. ४ स्थित कोर्वाङ झिम्पे स्वास्थ्य चौकी जयचौरबाट ४९ जना, वडा नं ५ स्थित प्राथमिक स्वास्थ्य केन्द्र लेखपोखराबाट ५६ जना, वडा नं. ६ स्थित छायाँछेत्र स्वास्थ्य चौकीबाट ७० जना र वडा नं. ७ स्थित आधारभूत स्वास्थ्य सेवा केन्द्र जामुनेखोलाबाट ४७ जना सुत्केरी भएका आमाहरूलाई पोषण कोसेली वितरण गरिएको उनले जनाइन् । उपाध्यक्षको पोषण कोसेलीको झोलामा चना, केराउ, सिमी लगायतका गेडागुडीहरू एक किलो, सर्वाेत्तम पिठो १ किलो र एक एक पिस साबुन र नङकट रहेको छ । पोषण कोसेली जिल्लामै उत्पादन भएको हो । ‘सुत्केरी आमाहरूलाई वितरण गरिएको पोषण कोसेली उहाँहरूलाई पुग्नेगरी दिइएको होइन, उहाँहरूलाई पोषणको महŒव बुझाउन र घरमा आफै पोषिलो खानेकुराहरू तयार गर्न सकिन्छ भनेर सिकाउनका लागि यस प्रकारको कार्यक्रम सञ्चालन गरिएको हो’, स्वास्थ्य शाखा प्रमुख भट्टराईले भनिन् । स्वास्थ्य संस्थामा सुत्केरी हुन आउने महिलाहरूले पोषणका लागि २ हजार ५ सय रूपैयाँ, यातायात खर्च वापत २ हजार रूपैयाँ र मापदण्ड अनुसार ४ पटक गर्भजाँच गरेमा उत्प्रेरणा स्वरूप ८ सय रूपैयाँ प्राप्त गर्नेगरेको उको भनाई छ ।

मातृ, नवजात शिशु तथा नाबालकको पोषण मार्फत होचोपन, पुड्कोपन र ख्याउटेपन न्यूनीकरण गर्ने र गम्भिर कुपोषणको व्यवस्थापन गर्ने उद्देश्य अनुरूप गाउँपालिकाले विभिन्न कार्यक्रम सञ्चालन गर्दै आएको जनाएको छ । विशेष गरि बालबालिकाको शुरूवाती वर्षहरूमा पोषणमा गरिने लगानीले उनीहरू, उनीहरूका परिवार र समग्र समुदायलाई नै दीर्घकालीन प्रतिफल दिने भएकाले छत्रेश्वरी गाउँपालिकाले ‘उपाध्यक्षको पोषण कोसेली’ कार्यक्रम सञ्चालन गरेको स्वास्थ्य शाखाको भनाइ छ ।