खोज

सल्यान, १४ मंसिर ।

सल्यानको लेखपोखरामा “युवा करियर परामर्श तथा सम्मान कार्यक्रम” सञ्चालन हुनेभएको छ ।

वडाका सफल र समाजमा योगदान दिएका व्यक्तिहरूलाई सम्मान गर्न र विद्यार्थी युवालाई करियर र जीवनमार्गबारे प्रेरणा दिनका लागि छत्रेश्वरी गाउँपालिकाको वडा नम्बर ५ लेखपोखरा गरिपारेमा कार्यक्रम हुन लागेको हो ।

आगामी बिहिबार (मंसिर १८) मा वडा कार्यालयको आयोजनामा हुन लागेको कार्यक्रममा वडाभित्रका विभिन्न क्षेत्रका व्यक्तिहरू सहभागी हुने भएको वडा अध्यक्ष फौद बहादुर बस्नेतले जानकारी दिए ।

निजामती सेवा, सुरक्षा निकाय, पत्रकारिता, कृषि, शिक्षा र अन्य सरकारी क्षेत्रमा कार्यरत व्यक्तिहरूलाई सार्वजनिक रूपमा सम्मान गरिने कार्यक्रम रहेको छ ।

साथै उनीहरुले युवा विद्यार्थीसँग आफ्ना सीप, अनुभव र कामको यात्राको बारे अनुभव सुनाउँदै आत्मबल बढाउनका लागि उत्प्रेरित गर्नेछन ।

“सम्मानसँगै कक्षा ९ र १० का विद्यार्थीलाई लक्षित गरी करियर परामर्श सत्र सञ्चालन गर्ने हाम्रो तयारी छ,” वडा अध्यक्ष तथा छत्रेश्वरी गाउँपालिकाका प्रवक्ता बस्नेतले भने, “सरकारी सेवा तथा अन्य रुचि अनुसारको क्षेत्रमा प्रवेश गर्ने उपाय, आवश्यक तयारी, सीप विकास, अवसर पहिचान, लक्ष्य बनाउने तरिका र जीवन अनुभवका महत्वपूर्ण सिकाइलाई वडाभित्रकै सफल व्यक्तिहरुबाट प्रस्तुतीकरण हुनेछ ।”

५ नम्बर वडाबाट धेरै जना सफल व्यक्तित्वहरूले सामुदायिक विद्यालयबाटै यात्रा सुरु गरी उच्च सरकारी सेवा, पत्रकारिता, कृषि र अन्य क्षेत्रमा स्थापित भएको र सामुदायिक विद्यालयबाटै पनि लक्ष्य भेटाउन सम्भव छ भन्ने साहस जगाउन युवा करियर परामर्श तथा सम्मान कार्यक्रम सञ्चालन गर्न लागिएको वडा कार्यालयले जनाएको छ ।

छात्रछात्रा, अभिभावक, स्थानीय नेतृत्व र विभिन्न क्षेत्रका सफल व्यक्तित्व एकै स्थानमा भेला हुन लागेका हुन् ।

छत्रेश्वरी, ५ ले यस अघिका बर्षहरुमा पनि शिक्षक अभिभावक तथा विद्यार्थीलाई उत्प्रेरणा कक्षा, बाल बिवाह, लागू औषध दुर्व्यसनी विरुद्ध सचेतनामुलक कार्यक्रम, आत्महत्या रोकथाम, रैथाने सीप प्रवर्द्धन, संस्कृति संरक्षण जस्ता विभिन्न सामाजिक अभियानहरु सञ्चालन गरेको थियो ।