खोज

कपिलवस्तु, १६ मंसिर ।

३८ औं विश्व एड्स दिवशको अवसर पारेर कपिलवस्तुको तौलिहवामा १४ एचआईभी संक्रमितलाई स्वास्थ्य र पोषण सम्बन्धी जानकारी तथा पोषण सामाग्री वितरण गरिएको छ ।

जिल्लाको कपिलवस्तु अस्पताल र महाराजगंज प्राथमिक स्वास्थ्य केन्द्रमा रहेको एआरटी सेन्टरमा एआरभी (एन्टीरेट्रो भाईरल) को सेवा लिदै आएका ६ सय २२ संक्रमित मध्ये भाइरल लोड बढी भएका १४ संक्रमितको पोषणमा सुधार ल्याउन सो सहयोग गरिएको हो । स्वास्थ्य कार्यालय कपिलवस्तु र एड्स हेल्थ केयर फाउण्डेशन (एएचएफ) र कपिलवस्तु अस्पतालको सहकार्यमा संक्रमितलाई सो सहयोग प्रदान गरिएको कपिलवस्तु अस्पतालमा रहेको एआरटी सेन्टरमा एएचएफबाट खटिएकी परामर्शदाता कुसुम थापाले जानकारी दिइन् ।

एआरटी सेन्टरमा संक्रमितलाई दिइने एआरभी (एन्टीरेट्रो भाइरल) औषधीले संक्रमितको शरीरमा रहेको एचआईभीको भाइरल लोड कम गर्ने काम गर्दछ । जसका कारण संक्रमितले अरुलाई संक्रमण सार्न सक्ने सम्भाव्यता घटाउने काम गर्दछ । त्यसैगरी एआरभीका कारण शरीरमा सिडीफोर सेलको संख्यामा बृद्धि आई रोगसँग लड्न सक्ने क्षमतामा सुधार आउँदै जान्छ ।

एआरभी सेवा लिदै आएका मध्ये शरीरमा भाइरल लोड १ हजार बढी भएका १४ जना संक्रमितहरुको पोषणमा सुधार ल्याउन अण्डा, चना, दाल, सुजी, तेल लगायत सामग्री हस्तान्तरण गरिएको हो । कपिलवस्तु अस्पतालका मेसु डाक्टर राजेन्द्र खत्री, गैसस महासंघ जिल्ला अध्यक्ष जय प्रकाश पाण्डेय, कपिलवस्तु अस्पतालका एचआईभी फोकलपर्सन डाक्टर मुकेश चौधरी, एआरटी सेन्टरका परामर्शदाताहरु कुसुम थापा र जरिना खान, नवजिवन संस्थाकी प्रेरणा विष्ठ लगायतले संक्रमितलाई पोषणयुक्त सामाग्री हस्तान्तरण गरेका थिए ।

सो अवसरमा बोल्दै कपिलवस्तु अस्पतालका मेसु डाक्टर राजेन्द्र खत्रीले एचआईभीको संक्रमण नियन्त्रण गर्न योजना, पुर्व तयारी र सचेतना आवश्यक रहेको बताए । पहिलो समय संक्रमित पत्ता लाग्ने दर नियन्त्रित अवस्थामा देखिए पनि सन २०३० सम्म संक्रमण पत्ता लाग्ने दरलाई शुन्यमा पुर्याउने लक्ष्य अनुसार अघि बढ्न आवश्यक रहेको उनको भनाइ थियो । “अवरोधहरु पार गरौं, एड्स प्रतिकार्य रुपान्तरण गरौं” भन्ने नाराका साथ यस बर्ष ३८ औं विश्व एड्स दिवश मनाइएको छ ।