खोज

सुनवल, ८ असार ।

नेपाली काँग्रेसका सभापति शेरबहादुर देउवाले संसदमा प्रतिपक्षको भूमिका थप मजबुत बनाउने बताएका छन् ।

काँग्रेसको भूमिका प्रभावकारी हुन नसकेको र कतिपयले आफ्नो समेत आलोचना गरिरहेको भन्दै देउवाले अब प्रभावकारी ढंगले प्रस्तुत हुने बताए । पश्चिम नवलपरासीको पाल्हिनन्दन गाउंपालिकाको महेशपुरमा स्वर्गीय सांसद पृथ्वीराज कंडेलको अर्धकदको शालिक अनावरण र बसपार्कको उद्घाटन गर्दै देउवाले यस्तो बताएका हुन् । जनजिविकाका सवालमा प्रतिपक्षले प्रभावकारी रुपमा भूमिका निर्वाह गर्ने देउवाको भनाई थियो ।

देउवाले नवलपरासीको एक मात्र मूल भन्सार भएर पनि महेशपुर भन्सार पुर्णरुपमा संचालनमा आउन नसकेको र यसको भौतिक एवं प्रशासनिक सुधारका लागि पहल गर्ने आश्वासन पनि दिए । पुर्व गृहराज्य मन्त्री एवं काँग्रेसका केन्द्रीय सदस्य देवेन्दराज कण्डेलका पिता पृथ्वीराज कण्डेलको स्मृतिमा बसपार्कको नामाकरण गरिएको र अर्धकदको शालिक निर्माण गरिएको हो ।

स्वर्गीय कण्डेल २०१५ सालमा पाल्हिमाझ खण्ड पुर्वी निर्वाचन क्षेत्र नम्बर ५७ बाट निर्वाचित सांसद थिए । स्वर्गीय कंडेल नेपाली काँग्रेसका केन्द्रीय सदस्य तथा पुर्व गृहराज्यमन्त्री देवेन्द्रराज कंण्डेलका पिता हुन् । सोही कार्यक्रममा जनता प्रगतिशिल पार्टीका अध्यक्ष हृदयेश त्रिपाठीले निजामती ऐन तत्काल पास गर्नुपर्ने बताए । त्रिपाठीले नेपाल भारत सिमा क्षेत्रमा हुने कुनै पनि क्रियाकलाप मधेसको सहमति बिना हुन नसक्ने पनि स्पष्ट पारे ।

त्रिपाठीले नेपाल र भारतको सिमानाकामा केही सांसदले काँडेतार लगाउनुपर्ने माग राखेको भन्दै मधेशी जनभावना र सुविधामा आँच आउने कुनै पनि कुरा नगर्न चेतावनी दिए । नवलपरासी क्षेत्र नम्बर १ का सांसद विनोद चौधरीले राजनीतिक दल फरक–फरक भए पनि जिल्लाको विकासमा सबै दल एकै स्थानमा उभिनुपर्ने बताए । कार्यक्रममा प्रदेश सभा सदस्य देवकरण कलवार सन्तुले उखु र केरा खेतीको पकेट क्षेत्र भएपनि यस क्षेत्रका किसानको उत्पादनले अझै पनि बजार पाउन नसकेको उल्लेख गरे । अर्का प्रदेश सभा सदस्य वैजनाथ कलवारले यस क्षेत्रको विकासका लागि महेशपुर नाकाबाट सुनवल हुँदै महलपोखरीबाट पाल्पा सम्म जोड्ने फराकिलो सडकको पहुँचका लागि पुर्वप्रधानमन्त्री समेत रहेका देउवाको ध्यानाकर्षण गराए ।

सो क्रममा पुर्व प्रतिनिधि सभा सदस्य प्रमोद यादव, जिल्ला समन्वय समितिका प्रमुख भगौती यादव रुदल, प्रतापपुर गाउँपालिकाका अध्यक्ष उमेशचन्द्र यादव, पाल्हीनन्दन गाउँपालिकाका अध्यक्ष वैजु प्रसाद गुप्ता दिपक, नेकपा माओवादी केन्द्रका जिल्ला ईन्चार्ज भविश्वर तिवारी, बसपार्क संरक्षण तथा व्यवस्थापन समितिका अध्यक्ष दुर्गाप्रसाद कलवार, अनिल उपाध्याय लगायतले बोलेका थिए । संघीय सरकारको एक करोड, पाल्हीनन्दन गाउँपालिकाको १३ लाख गरी कुल १ करोड १३ लाखको लागतमा बसपार्क निर्माण भएको बसपार्कका संरक्षक देवेन्द्रराज कंण्डेलले जानकारी दिए । सो क्रममा उनले कंण्डेल परिवारले विगतदेखि यस क्षेत्रको विकासमा ठुलो योगदान पुर्याएको बताए । साथै उनले सुस्तालाई गण्डकी प्रदेशमा गाभ्ने कुरा कुनै हालतमा मान्य नहुने पनि बताए ।