खोज

बुटवल, ११ जेठ । विश्व फुटबल खेलमा नयाँ खेलाडी छनौटको आधार क्लब र लिग प्रतियोगिता प्रमुख मानिन्छ । क्लब र लिग खेलमा प्रतियोगितामा उत्कृष्ट प्रदर्शनको आधारमा खेलाडी राष्ट्रिय टिममा पर्ने र खेलाडीको आफनो पहिचान बनाउन सफल भएको पाउछौ । फिफा आफना सदस्य राष्ट्रमा अक्षरस यसलाई पालना गर्न चाहन्छ । एन्फा पनि यसलाई कार्यान्वन गर्ने गरि वार्षिक क्यालेण्डर बनाएर अघि बढेको छ । तर आन्तरिक किचलो, राजनीतिक अस्थितरताका कारण नेपालमा क्लब र लिग प्रतियोगिताले निरन्तर पाउन कठिनाई छ । नेपालका धेरै गाउगाउमा प्रतिभाशाली खेलाडीहरू भएपनि उनिहरू आफनो क्षमतालाई प्रदर्शन गर्ने अवसरबाट बन्चित भएको पाउछौ ।

अखिल नेपाल फुटबल संघ (एन्फा) मा नया नेतृत्व आएसंगै राकिएको जिल्ला लिग संचालन गर्न सफल भएको केन्द्रिय उपाध्यक्ष दीर्घ बहादुर केसी (कुमार)को दाबी छ । जिल्ला लिग फुटबलको पर्व भएको भन्दै यसलाई पारदर्शी र जिल्लाभरिका खेलाडीहरू भाग लिने अवसर सृजना गर्नुपर्ने बताउछन । ‘लिगलाई कर्मकाण्डी गराउन हुन्न,’ उनले भने । खेलाडीहरूलाई ब्यवसायीक र खेललाई आकर्षण बनाउने गरि जिल्लाहरूबाट समेत आफ्नो क्षेत्रबाट श्रोत ब्यवस्थापनमा जोड दिनुपर्ने उनको सुझाव छ ।

रूपन्देहीमा एक वर्ष ग्याबमा शनिबारदेखि जिल्ला लिग २०७९/०८० हुने भएको छ । गाउँगाउँमा लुकेका युवा खेलाडीहरू आफ्नो प्रतिभा प्रस्फुटन गर्ने तयारीमा छन । रूपन्देही जिल्ला फुटबल संघको आयोजनामा शनिबारदेखि हुने लिगको सबै तयारी पुरा भएको संघका अध्यक्ष लोक पुनले पत्रकार सम्मेलन गरि बताए । फिफा र एन्फाको निर्देशनमा जिल्ला क्वालिफाईयर अनिवार्य भएको उनले बताए । भौगोलिक रूपमा ठूलो जिल्ला हँुदा यहाँ धेरै क्लब रहेपनि ११– १८ क्लबमात्र सदस्यता पाउने ब्यवस्था अनुसार सदस्यता दिँदै आएको उनले बताए ।

प्रतियोगितामा उपाधि विजेताले नगद १ लाख, उपविजेताले ५० हजार, तृतीय ३० हजार र २० हजार रूपैयाँ पुरस्कार राशिबाट पुरस्कृत गरिने उनले बताए । गाउँगाउँमा लुकेर रहेका ७०४ जना खेलाडीहरूले यो लिगमा विभिन्न क्लबबाट खेल्ने अवसर पाउने उनले बताए । ‘विभिन्न क्लबबाट खेलाडीहरू दर्ता भएर आएका छन,’—उनले भने । खेलाडीको हकमा ए, बि र सि डिभिजन नखेलेको र जिल्लाभित्रका खेलाडीमात्र सहभागी हुन पाउने प्रावधान छ । यसपटक एन्फाबाट ७ लाख रूपैयाँ प्रतियोगितालाई सहयोग भएको उनले बताए । पूर्वाधार सहितको देविनगर एन्फा एकेडेमीलाई छिटोभन्दा छिटो चलाउने तयारीमा रहेको उनले बताए ।

कार्यक्रममा संघका उपाध्यक्ष तथा लिग प्रतियोगिताका संयोजक मुकेश कुवरले लामो ईतिहास बोकेको लिग प्रतियोगिता सीमित क्लब बिच खेलिदै आएकोमा अघिल्लो पटकबाट तोडिएको बताए । दुई वर्षअघि आयोजना भएको लिगमा २ टिम रेलिगेसनमा र ४ वटा नवीकरण नगरेपछि नया क्लबहरूले अवसर पाएको उनी बताउँछन । ‘योसँगै नयाँ दुईवटा श्री विश्व शान्ति र हिमाल युथ क्लब छनौट भएर जिल्लामा प्रवेश पाए,’—उनले भने । यो वर्ष भएको पहिलो चरणबाट छनौट भएको २ टिमहरू हिमाल युथ र स्रिमिक युवा क्लब उक्लेको छ । लिगको टप ८ टिमहरू र बि लेभलबाट उक्लिएका दुई टिम गरि १० टिम बिच लिग खेल हुनेछ ।

कार्यक्रममा संघका महासचिव हिमाल गौचनले जेठ १२ गते सुनौलो संगम युवा क्लब र हिमाल युथ क्लब बिच उद्घाटन खेल हुने बताए । प्रतियोगितामा ९ वटा क्लबका बीच ३७ खेल हुनेछ । १९ दिनसम्म चल्ने प्रतियोगितामा साढे ८ लाख रूपैयाँ खर्च हुने अनुमान रहेको संघका कोषाध्यक्ष गोपिराम पुनले बताए ।