खोज

बुटवल ।

कपिलवस्तु एमालेमा नेताको साथ र समर्थन पाएका उम्मेदवारलाई पराजित गर्दै बाबुराम खनाल अध्यक्षमा विजयी भएका छन् । १० औं जिल्ला अधिवेशनबाट पार्टीका निवर्तमान अध्यक्ष डम्बर शर्मालाई पराजित गर्दै बाबुराम खनाल अध्यक्षमा विजयी भएका हुन् ।

शर्मालाई पार्टीका केन्द्रदेखि जिल्ला तहसम्मका नेताको समर्थन थियो भने खनाल कार्यकर्तामाझ लोकप्रिय थिए ।

लुम्बिनी प्रदेशका केही जिल्लामा एमाले उपाध्यक्ष विष्णु पौडेल र महासचिव शंकर पोखरेलको नाम जोडेर प्रचार गरिएपनि कपिलवस्तुमा दुवै समूहका नेताहरु भनेर चिनिनेहरुले शर्मालाई नै अध्यक्ष बनाउन प्रयास गरेका थिए । तर अधिकांश नेताहरुको साथ पाएका निवर्तमान अध्यक्ष शर्माको नेतृत्वमा पुग्ने प्रयास सफल हुन सकेन । उनी पक्षका अधिकांश नेता अधिवेशनमा पराजित भए ।

शर्माको पक्षमा संघीय भूमि व्यवस्था, सहकारी तथा गरिबी निवारण मन्त्रीसमेत रहेका एमाले पोलिटब्यूरो सदस्य बलराम अधिकारी, पोलिटब्यूरो सदस्य तथा कपिलवस्तु इन्चार्ज खिमलाल भट्टराई, राष्ट्रिय सभाका उपाध्यक्षसमेत रहेकी नेतृ विमला घिमिरे, केन्द्रीय सदस्य तथा लुम्बिनी प्रदेश सभा सदस्य गिरिधारीलाल न्यौपाने, लुम्बिनी प्रदेशका मन्त्री अर्जुन केसीसहित अधिकांश प्रभावशाली नेताहरु लागेका थिए ।

बुधबार अधिवेशन उद्घाटन कार्यक्रमलाई सम्बोधन गर्दै एमाले अध्यक्ष केपी शर्मा ओलीले माथिको आधिकारिक उम्मेदवार कोही नभएकाले कसैले त्यसरी प्रचार गरे प्रतिनिधिले हराएर पठाउनुपर्ने बताएका थिए । ठीक त्यसै गरेर प्रतिनिधिले मतदान गरेका छन् ।

शर्मा पक्षका नेताहरुले उम्मेदार मनोनयनपछि अध्यक्षमा मनोनयन गरेका निवर्तमान उपाध्यक्ष विश्रामप्रसाद चौधरीलाई फिर्ता गराएर उनको पक्षमा माहोल बनाएका थिए । उनी पक्षका एक नेताले चौधरीको उम्मेदारी फिर्ता भएपछि शर्माले फराकिलो मतान्तरले निर्वाचन जित्ने आंकलन गरेका थिए । तर नतिजा ठीक उल्टो आयो ।

शर्मा एमाले कपिलवस्तुको २०७८ पुसमा भएको ९ औँ अधिवेशनबाट जिल्ला अध्यक्षमा निर्वाचित भएका थिए । उनको यो कार्यकालमा स्थानीय तथा संघ र प्रदेशको चुनावमा पार्टीले यसअघिभन्दा राम्रो स्थान ल्याएको भन्दै नेताहरुले प्रशंसा गरेपनि पार्टी प्रतिनिधिले रुचाएनन् ।

नेतृत्वमा विजयी बाबुराम खनाल एमाले कपिलवस्तुका विभिन्न जनवर्गीय संगठन र पार्टीको लामो राजनीति गरेकाले बलियो दावेदार मानिएपनि धेरै नेताहरु उनको पक्षमा थिएनन् । खनाल जिल्ला सदस्य, सचिव, उपाध्यक्ष हुँदै पार्टीको प्रदेश कमिटी सदस्य बनिसकेका अनुभवी नेता हुन् । जिल्लाको नवौं अधिवेशनमा अध्यक्षका लागि उम्मेदवार रहेका खनाल शर्मासँग पराजित भएका थिए ।

कपिलवस्तु जिल्लाको उत्तर–दक्षिणी क्षेत्रमा पार्टीको संगठन विस्तार र विभिन्न निकायसँगको समन्वयकारी भूमिका राख्न दख्खल रहेका खनालले अघिल्लो अधिवेशनमा पराजित भएपछि पनि निरन्तर पार्टी काममा लागेको बताएका थिए । खनालको पक्षमा भने प्रदेश सांसद विष्णु पन्थी, पूर्व जिल्ला अध्यक्ष झविलाल पोख्रेललगायतले समर्थन गरेका थिए ।

त्यसैगरी उपाध्यक्षमा पराजित भेषराज पाण्डे मन्त्री बलराम अधिकारीका प्रमुख स्वकीय सचिव हुन् । उनी पनि डम्बरको लाइनबाट उम्मेदार बनेका थिए । उनी मन्त्रीको स्वकीयमा जाँदा पनि जिल्लामा उम्मेदवार हुन पाउने सहमति गराएर मात्रै गएका थिए । उनी नेता शंकर पाण्डेसँग फराकिलो मतले पराजित भएका हुन् ।

सचिवमा विजयी सिबी गहतराज पनि बाबुराम समूहमै थिए । उनले शर्मा समूहका विश्व कार्कीलाई फराकिलो मतले जितेका हुन् । त्यसैगरी उपसचिवमा विजयी देवी पोखरेल र शुशीला दर्लामी पनि खनाल समूहकै भएको दावी गरिएको छ ।

एमालेका जिल्ला अधिवेशनमा उपाध्यक्ष पौडेल र महासचिव पोखरेल समूह बनेर प्रतिस्पर्धा गरेको विषय बाहिर आएपनि कपिलवस्तुले त्यसलाई उल्टाइदिएको छ ।

बाहिर प्रचार गरिए जसरी जिल्ला तहमा नेताहरुको समूह नबनेको एमाले प्रदेश कमिटी सचिवालय सदस्य मोहन चापागाईले बताए । उनले नवलपरासी, बर्दिया, रुकुमपूर्व,रोल्पा र कपिलवस्तुका निर्वाचनमा त्यसरी समूह नबनेको जनाए ।

एमाले पोलिटब्यूरो सदस्य तथा कपिलवस्तु इन्चार्ज खिमलाल भट्टराईले जिल्लामा कुनै नेता विशेषको समूह नभएको र बाहिर प्रचार भएको गुट पनि भत्काएको बताए । उनले जिल्लामा प्यानलगत उम्मेदारी पनि नभएको दावी गरे ।

एमाले लुम्बिनी प्रदेश प्रचार विभाग प्रमुख डिआर घिमिरेले अबको नेतृत्वका लागि कोही नेता विशेषको पक्षमा भन्दा भूगोलमा काम गर्नुपर्ने सन्देश आएको बताए । उनका अनुसार प्रदेशका कुनै जिल्लामा कोही नेताले समूहगत उम्मेदारी दिन लगाएको प्रचार गलत भएको तर केही व्यक्तिले त्यसरी प्रचार गरेको हुनसक्ने जनाए ।