खोज

सुनवल, २१ वैशाख ।

नेकपा एमालेका अध्यक्ष तथा पुर्व प्रधानमन्त्री केपी शर्मा ओलीले वर्तमान गठबन्धन भत्काउने प्रयत्न भईरहेको बताएका छन् । शुक्रबार नेकपा एमाले पश्चिम नवलपरासीको नवौँ जिल्ला अधिवेशनलाई सुनवलमा उद्घाटन गर्दे अध्यक्ष ओलीले गठबन्धन भत्काउने खेल सुरु भईसकेको बताएका हुन् ।

देशी विदेशी शक्तिहरु गठबन्धन भत्काउन लागिपरेको बताउँदै उनले एमाले यही गठबन्धन टिकाउने पक्षमा रहेको उल्लेख गरे । प्रतिक्रियावादी शक्तिले अहिलेको गठबन्धन भत्काए भने आगामी निर्वाचनबाट एमाले निर्णायक शक्तिको रुपमा उदाउने बताउँदै त्यसपछि गठबन्धनको आवश्यकता नै नपर्ने दाबी पनि उनले गरे ।

अध्यक्ष ओलीले प्रधानमन्त्री पद अहिले अक्षय तृतियामा बाँडिने सातु र सर्वत भन्दा पनि सस्तो भएको टिप्पणी गरे । ओलीले भने, ‘सातु र सर्वत समेत अक्षय तृतियामा त्यसरी बाँडिदैन होला जसरी अहिले प्रधानमन्त्री पद बाँडिदैछ ।’ नाम नलिई माधव नेपाल प्रति व्यङग्य गर्दे ओलीले प्रधानमन्त्री बन्ने भन्दै तमसुक बोकेर हिडिरहेकाहरु प्रधानमन्त्री बन्न नसक्ने आफुलाई थाहा भएको बताए ।

अध्यक्ष ओलीले मुलुकको आन्तरिक मामिलामा हुने बाह्य हस्तक्षेपबाट देशलाई मुक्त गर्न राष्ट्रिय शक्ति निर्णायक रुपमा विकास गर्नुपर्ने सबैभन्दा टड्कारो आवश्यकता रहेको बताए ।

राष्ट्रिय स्वाधिनताको सवालमा एमालेले कसैसंग सम्झौता नगर्ने बताउँदै अध्यक्ष ओलीले बाह्य शक्तिबाट सहायता लिने तर आश्रित हुन नहुने धारणा व्यक्त गरे । नेपाली भूमि रक्षा गर्ने, स्वाधिनताको रक्षा गर्ने ठेक्का एमालेलाई मात्रै दिए जस्तो भएको बताउदै आफुहरु उक्त एजेन्डाबाट विमुख नहुने पनि उल्लेख गरे । ओलीले सुस्ता बचाउनका लागि वि. सं. २०२५ सालमा काठमाण्डौमा आन्दोलन गर्ने क्रममा पहिलो पटक आफु पक्राउ परेको स्मरण गर्दे उक्त गिरफ्तारी राजनैतिक जिवनको पहिलो गिरफ्तारी भएको पनि बताए ।

अध्यक्ष ओलीले शुक्रबार बिहान भारतीय अतिक्रमणको चेपटामा पर्दै आएको सुस्ताको पनि अवलोकन गरेका थिए । पारी सुस्ता गाउँ नगएपनि उनले पारी सुस्ता जानका लागि नारायणी नदीमा बन्दै गरेको झोलुङ्गे पुलको निरीक्षण गरे ।

यसैगरी ओलीले त्रिवेणी धाम सहित गौमत वुद्धको एक मात्र सिंगो अस्थीधातु रहेको स्थल रामग्राम स्तुपको पनि शुक्रबार नै अवलोकन गरेका छन् । रामग्राम स्तुपको विषयमा विशेष चासो राख्दै ओलीले स्तुपको थुम्कोमै पुगेर त्यसबारे जानकारी लिएका थिए । सो क्रममा रामग्राम नगरपालिकाका नगर प्रमुख धनपत यादवले स्तुपको महत्व र यसको विकासमा भईरहेको ढिलाई बारे अध्यक्ष ओलीलाई जानकारी गराएका थिए । संघीय सरकार मातहत रहेको लुम्बिनी विकास कोषकै कारण रामग्राम पछाडी परेको भन्दै यादवले त्यस विषयमा संघीय सरकारको ध्यानाकर्षण गराउन अध्यक्ष ओलीसंग आग्रह पनि गरे ।

यसैबिच एमालेको सुनवल स्वाठीमा शुक्रबारबाट सुरु भएको अधिवेशन नयाँ नेतृत्व चयन गर्दे सकिने छ । अधिवेशन उद्घाटन कार्यक्रममा एमाले केन्द्रीय सचिव पद्यमा अर्याल, लुम्बिनी प्रदेश अध्यक्ष राधाकृष्ण कंडेल, पोलिट्व्युरो सदस्य वैजनाथ चौधरीे, पाल्पाका एमाले अध्यक्ष धनेन्द्र घिमिरे, एमाले नवलपरासीका अध्यक्ष दिपेन्द्र कुमार अधिकारी, उपाध्यक्ष डोलराज भण्डारी लगायतले सम्बोधन गरेका थिए ।

शुक्रवारबाटै चुनावी कार्यक्रम सुरु भएको सचिव धिरज शर्मा बस्यालले जानकारी दिए । १ सय पाँच सदस्यीय जिल्ला कमिटीका लागी ४ सय २६ जना प्रतिनिधिले मतदान गर्नेछन् । अध्यक्ष पदका लागि वर्तमान अध्यक्ष दिपेन्द्र कुमार अधिकारी र सचिव धिरज शर्मा बस्याल आकांक्षी छन् । सर्वसम्मतको प्रयास आन्तरिक रुपमा भईरहेपनि हाल सम्म भने सहमति जुट्न सकेको छैन । अध्यक्ष ओलीले सहमति नभए धेरै छलफल नगरी समयमै मतदान गरेर नेतृत्व चयन गर्न निर्देशन दिएका छन् ।