खोज

बुटवल, ९ बैशाख ।

सडक दुर्घटनासंगै मानवीय र भौतिक क्षति न्युनीकरण गर्ने लक्ष्यसहित पश्चिम नेपाल बस ब्यवसायी प्रालिले चालक, सहचालकहरुलाई आन्तरिक सवारी ब्यवस्थापन तथा दुर्घटना न्युनीकरण प्रशिक्षण कार्यक्रम गरेको छ । संस्थामा रहेका ब्यवसायी तथा सवारी चालकहरुलाई लक्षित गरी विगत १५ वर्षदेखि प्रशिक्षण दिंदै आएको हो ।

प्रालिका संचालक नारायण घिमिरेले नियमित प्रशिक्षणलाई जोड दिंदा दुर्घटनाको दर घटाउन सफल भएको बताए । ‘वि.सं. २०६६ सालदेखि प्रशिक्षणलाई नियमित दिंदै आएका छौ’—उनले भने । यो १५ वर्षको अवधिमा करिब ८ हजार बढीलाई प्रशिक्षण दिन सफल भएको उनले बताए । ‘प्रशिक्षणकै कारण दुर्घटना १५ प्रतिशतसम्म घटेको छ’—उनले भने । प्रशिक्षणबाट चालक सहचालकलाई अनुशासित बनाउन, सामान्य तर महत्वपूर्ण कार्यप्रति सजग बनाउन र उत्तरदायी बनाउन कार्यक्रम सफल भएको उनले बताए । ‘असल चालक बन्नुपर्छ’—उनले भने । प्रालिबाट दिईने प्रशिक्षण प्राप्त चालकलाई दिईने परिचय पत्रबाट ट्राफिक प्रहरीबाट हेर्ने दृष्टिकोण परिवर्तन भएको उनले बताए । स्थानको दुरी अनुसार क, ख, ग र घ गरी चार वर्गमा सवारीचालक परिचयपत्रलाई वर्गीकरण गरिएको उनले बताए । खाना खुवाउने स्थानको बारेमा सबैभन्दा ठूलो गुनासो आएको भन्दै उनले प्रालि यस विषयमा गम्भीर रहेको बताए ।

कार्यक्रममा नेपाल प्रहरी राजमार्ग सुरक्षा तथा ट्राफिक ब्यवस्थापन कार्यालय बुटवलका प्रहरी निरिक्षक शोभा पाण्डेले सवारी दुर्घटना न्युनीकरण तथा सुरक्षित सडक प्रयोग सम्बन्धी जानकारी दिदै दुर्घटना न्युनीकरणमा चालकको भूमिका र प्रतिवद्धता महत्वपूर्ण हुने बताईन् । चालक मनबाट चाहेमा दुर्घटना न्युन हुने तर्क दिदै यसबाट कम क्षति हुने बताईन् ।

प्रतिस्प्रधात्मक चालक नबन्न सुझाव दिदै सवारी छुटे भनेर दुख मान्नुभन्दा सहज ढंगबाट सवारी सेवा दिन उनले आग्रह गरिन् । चालक पेशा उत्कृष्ट भएको दाबी गर्दै उनले सबैलाई जोड्ने पुलका रुपमा यो पेशा भएको बताईन् । केही सिमित चालकको अघोषित नियमहरुका कारण समग्र पेशा नै धरापमा परेको उनले दुखेसो गरिन् । आफ्नो पेशालाई उत्कृष्टबाट निकृष्ट बनाउने दोषी आफै भएको उनले दाबी गरिन् ।

कार्यक्रममा नेपाल यातायात स्वतन्त्र मजदुर संगठन, लुम्बिनी प्रदेशका ईन्चार्ज ठाकुर गैरेले ब्यक्तिगत नेतृत्वसंगै संगठनमा आवद्ध भई अघि बढ्न मद्दत मिल्ने बताए । सभ्य भाषाको प्रयोग, जिम्मेवार प्रति बोध जस्ता कुरामा ध्यान दिनुपर्ने उनले सुझाव दिए । प्रशिक्षणमा दिईएको ज्ञान ३० प्रतिशतमा ब्यवहारमा लागू गर्नसके ७० प्रतिशत दुर्घटना कम हुने उनले दाबी गरे ।

कार्यक्रममा अखिल नेपाल ट्रेड युनियनका हेम पाण्डे, प्रालिका संचालक जितेन्द्र खत्रीले सिकाई निरन्तर हुने तर्क दिदै स्वरोजगार चालक बन्न प्रशिक्षण फाईदाजनक भएको बताए ।