खोज

सुर्खेत, ९ वैशाख ।

मुख्यमन्त्री नियुक्त भएको दुई साता हुँदा सम्म पनि कर्णालीमा मन्त्रीपरिषद् विस्तारको काम हुन सकेको छैन । गएको चैत २७ गते मुख्यमन्त्रीमा यमलाल कँडेल नियुक्त भएका हुन् । तर, हालसम्म पनि अन्य मन्त्रालयहरू भने मन्त्रीविहीन भएका छन् ।

भागवण्डा नमिलेकै कारण मन्त्रिपरिषद् विस्तारमा ढिलाइ भएको सत्तारुढ दलकै नेताहरु बताउँछन् । प्रदेशस्तरमै सहमति जुटाउन नसकेपछि मुख्यमन्त्री कँडेल काठमाडौँसम्म पुगेका थिए ।

कर्णाली प्रदेशमा माओवादीले ‘अर्थ, सामाजिक, उद्योग र जलस्रोत तथा ऊर्जा गरी चारवटा मन्त्रालय माग गरेको छ । सामाजिक विकास मन्त्रालयमा दुवै दलको दावी हुँदा पनि कुरा मिल्न सकेको छैन । माओवादीले पनि उक्त मन्त्रालयमा दावी गरेको छ भने मुख्यमन्त्री कँडेलले सामाजिक विकास मन्त्रालय आफैसँग राख्न चाहेका छन् ।

एमालेका प्रमुख सचेतक टेक पछाई मुख्यमन्त्रीलाई काम गर्न सजिलोका लागि सामाजिक विकास मन्त्रालय एमालेलाई दिन आग्रह गरेको बताए  । उनले दुवै दलबीच सहमति भएमा छिटै नै मन्त्रीपरिषद् विस्तार हुने बताए । मन्त्रालय बाँडफाडको विषयमा कुरा मिल्न बाँकी रहेको उनको भनाई थियो ।

यता माओवादीका प्रमुख सचेतक रणसिंह परियार गठबन्धनलाई सहज बनाइ अघि बढ्ने कुरामा मुख्यमन्त्री अग्रसर हुनुपर्ने बताउँछन् । कर्णालीमा ८ वटा मन्त्रालय छन् ।