खोज

सल्यान, ६ वैशाख ।

सल्यान उद्योग वाणिज्य संघको शनिबार हुने निर्वाचनको तयारी अन्तिम चरणमा पुगेको छ । निर्वाचन समितिका अनुसार मतपत्र देखि निर्वाचन सामग्री व्यवस्थापन र सुरक्षा प्रवन्धको काम पूरा भइसकेको छ । शुक्रबार सरोकारवाला सहित निर्वाचन समितिको बैठक बसेर अन्य आवश्यक निर्णय गरिने सल्यान उद्योग वाणिज्य संघको निर्वाचन समितिले जनाएको छ ।

शुक्रबार विहान ७ बजेदेखि उम्मेदवारहरुले प्रचारप्रसार गर्न नपाउने पनि निर्वाचन समितिका संयोजक विर बहादुर सेजवालले जानकारी दिए । उनका अनुसार मौन अवधिमा प्रचारप्रसार लगायतका नियमविपरित कार्य गरेमा नियन्त्रणमा लिने, स्पष्टीकरण सोध्नेदेखि पुष्टी भएमा उम्मेदवारी खारेज सम्मको कारवाही हुने छ । शनिबार विहान ८ बजेदेखि अपरान्ह ४ बजेसम्म मतदानको समय तोकिएको निर्वाचन संयोजक सेजवालले जनाए । पदाधिकारीको एउटा र सदस्यहरुको एउटा गरेर दुईवटा मतपत्र रहने जानकारी दिदै उनले उद्योग वाणिज्य संघको हलमा हुने मतदानमा ६ वटा मतपेटीकामा मतदान गर्न सक्ने व्यवस्था मिलाइने बताए । मतदाताले साथमा स्थायी लेखा नम्बरको सक्कल, आफ्नो परिचय खुल्ने मान्यता प्राप्त परिचयपत्र नागरिकता, मतदाता परिचयपत्र, सवारी लाइसेन्स, राष्ट्रिय परिचयपत्र मध्ये कुनै एक ल्याउनुपर्ने निर्वाचन समितिले जनाएको छ ।

सल्यान उद्योग वाणिज्य संघको निर्वाचनमा २१ पदका लागि ४२ जना उम्मेदवारहरुले प्रतिष्पर्धा गर्दैछन् । जिल्लाभर एक हजार ९२६ जना मतदाता रहेको निर्वाचन संयोजक सेजवालले जनाए । निर्वाचनलाई मर्यादित, विश्वसनीय, पारदर्शी, निष्पक्ष रुपमा सम्पन्न गर्नका लागि सिसि कयामेराबाट निगरानी संगै आवश्यक जनशक्ति व्यवस्थापन गरिने उनको भनाई छ । ५ जनाको निर्वाचन समिति संगै कार्यालयको अन्य जनशक्तिलाई पनि निर्वाचनमा उपयोग गरिने सेजवालले बताए ।

आगामी नयाँ नेतृत्वको लागि दुई वटा प्यानल बनाएर उम्मेदवारहरु निर्वाचनमा होमिएका छन् । नेकपा एमाले, नेकपा माओवादी केन्द्र, नेकपा एकीकृत समाजवादी र विप्लव नेतृत्वको नेकपाको समर्थनमा संयुक्त व्यवसायिक प्यानलबाट अध्यक्षमा बिरेन्द्र श्रेष्ठ र नेपाली कांग्रेस र राप्रपाको समर्थनमा संयुक्त लोकतान्त्रिक व्यवसायिक प्यानलबाट भरत बस्नेतले अध्यक्ष पदमा प्रतिष्पर्धा गर्दैछन् ।

संयुक्त व्यवसायिक प्यानलबाट वरिष्ठ उपाध्यक्षमा राजेन्द्र कुमार थापा, वाणिज्य उपाध्यक्षमा राजेन्द्र बहादुर भण्डारी, उद्योग उपाध्यक्षमा पलविर नेपाली, महासचिवमा मोहन सारु, सचिवमा रन बहादुर खडका र कोषाध्यक्षमा नरेन्द्र बुढा मगरले उम्मेदवारी दर्ता गरेका छन् । यस्तै संयुक्त लोकतान्त्रिक व्यवसायिक प्यानलबाट वरिष्ठ उपाध्यक्षमा धिरज केसी, वाणिज्य उपाध्यक्षमा चन्द्र बहादुर बुढा, उद्योग उपाध्यक्षमा हपिस भण्डारी, महासचिवमा मानबहादुर वली, सचिवमा ईन्द्रा भण्डारी र कोषाध्यक्षमा कमल घर्तीमगरले प्रतिष्पर्धा गर्दैछन् ।